麥菲文開倉初期成績未算理想，可能因嗰單行馬機事件令多駒受傷，馬房要重新調整訓練策略。繼前次夜賽憑「友歡笑」贏馬後，上周末又以初出新馬「龍串鳳」再贏多場，目前有八場頭馬，總算有所突破。「龍串鳳」一出即勝，配莫雷拉有將近九倍獨贏，幕後信心如何可想而知，大抵他們亦知道這駒並非在十足水準下出戰，但一樣能贏，保持進度料可替馬房添多兩場頭馬。夜賽出戰第六場第三班千二米嘅「好吉利」，首戰便是跑谷草千二米一出即勝，且贏馬姿態並非一般三班馬可抵抗，該仗「好吉利」走位是10 7 1。起步唔快，入到直路憑谷中短短三百餘米衝刺，竟然可以喺終點前擒下「叫關健康」及「問鼎高峰」兩匹三班谷草短途好手，經已證明其實力並非泛泛之輩。這一仗勝出，亦立刻換來加八分升班代價，不過幕後似乎並未急於一時，陣上未見使出其真正威力，最近「好吉利」降回三班，即上場跑谷草千二米。開齋騎師潘頓即討回策騎權，由於呢一戰抽到喺十二檔起步，鞍上人採留後衝戰術，直路居內欄搵位衝，結果全程未望空過，最後只輸四個馬位俾頭馬「再石磨藍」，假如呢仗俾隻馬搵到位衝，四個馬位距離絕對有本錢收復，潘頓上次搏輸了，今次一早揀回上陣，即使同場有近期上名的「喜進」，他亦放棄索騎。所以從潘頓的選擇，多少顯出他對「好吉利」的重視，麥菲文攻勢，相信可由「友歡笑」開始，進行大反擊了。