「軍」系馬一向都好支持韋達，早前佢替「軍歌」重響勝鼓，後又替「軍民歡」跑入冷位，令幕後一度燃起跑打吡希望，因為「軍民歡」經已報名今屆打吡大賽，而今周四將公布正選名單，但「軍民歡」現只得八十二分，能入選機會甚微。而今次第五場四班一哩嘅「軍勇戰神」，一早預咗俾韋達騎，屆時韋達必然再為呢系人馬賣力，報答知遇之恩。講一講呢隻「軍勇戰神」，踏入今季已是在港第三季，至今仍未贏得頭馬，但有上名成績，曾於田草千二米上名，又在谷草一哩入三甲，短途與中距離呢隻馬均曾上名，今季呢隻馬跑過三仗，均屬谷草千二米，但表現普通，今次馬房安排牠跑回谷草一哩，應該係打硬仗嘅時候。
大家有否發覺「軍勇戰神」上季在谷草一哩入位後，馬房再安排呢隻馬跑過兩次谷草一哩，但呢兩次得個近字，一場係輸俾頭馬「金獅叻將」四個身位，另一場係輸兩個幾馬位俾「睡德福」，之後又跑過三場谷草千二米無功，令今季評分從三班降至四班，既然上季連續跑咗三場谷草千二米無功，今季降到落四班，首三仗依然跑谷草千二米，無成績交出是意料中事。馬房刻意如此安排，只係想俾「軍勇戰神」多跑窄場熟習環境兼熱身，狀態隨呢三仗不合腳法路程賽事後經已靜悄悄被谷起，這次增程跑谷草一哩，善忘馬迷只會睇近績，發覺其三戰谷草短途演出均是麻麻，增程跑無頭馬成績嘅一哩就唔會點理會。不過，知道練馬師如此有耐性，先將「軍勇戰神」減分落到四班，再跑過三場熱身賽先至報回合適路程，呢個咁細心部署，就足以令大家今次捧呢隻「軍勇戰神」場，韋達騎呢系馬一向都咁好鬥志，加上今場對手實力確實麻麻，呢隻未交代馬今次喺谷草一哩列陣，應是見真章嘅時候。