■鴿黨前晚搞黨慶，邀請咗特首林鄭月娥出席，林鄭仲捐咗3萬蚊贊助李華明獻唱《笑看風雲》。早知今日，當初點解要黐埋激進派度呢？鴿黨（民主黨）前晚搞黨慶，邀請咗特首林鄭月娥出席，林鄭仲捐咗3萬蚊贊助李華明獻唱《笑看風雲》，咁樣一來一回，鴿黨就俾班激進支持者鬧到反艇。進退失據嘅鴿黨主席胡志偉就話民主黨一向接受無條件捐款，林卓廷就搬埋曼德拉出嚟話「和解要雙方同意，絕不是單方面宣布（佈）」。前晚請人嚟食飯，第二日就割蓆，咁夾硬嚟嘅做法唔少人都頂佢哋唔順，有網民就話︰「今次我buy林鄭喎！你地（哋）對佢咁好，人地（哋）有哩（呢）個感覺好人性啫，會唔會係你地（哋）反省吓先呢。」
致力改善行政立法關係嘅林鄭，前晚應邀出席鴿黨黨慶，仲捐咗3萬蚊畀鴿黨。佢當晚亦喺Instagram貼相，加埋「笑看風雲」、「大和解」嘅標籤，反對派一場腥風血雨嘅互片就咁開始。
其實，特首去政黨黨慶本身唔係咩問題，3萬蚊亦唔係咩大數目，但係近年黐埋激進派度、心思思想行激進路線嘅鴿黨，話抗爭「講就兇狠」、話「全面開戰」又唔係好覺眼，激進派早就睇佢哋唔順眼，𠵱家仲同林鄭談笑風生，一班人當然有仇報仇。政圈中人紛紛出文冷嘲熱諷，例如「熱血公民」立法會議員蟲泰（鄭松泰）就喺fb話︰「三萬蚊......」；「獨派」fb專頁「無神論者的巴別塔」亦揶揄鴿黨係「利益輸送」。
胡志偉其後「解畫」，話佢哋一向接受無條件捐款，話自己監察政府、推動民主唔會變，又認為林鄭距離與社會大和解仲好遠喎。
林卓廷就搬埋曼德拉出嚟，講話歷史上最出名嘅大和解，「是南非處理種族隔離政策引起的歷史傷痛」，仲話和解有3個前提，分別係交出政權、實現民主；承認歷史錯誤；要雙方同意，「絕不是單方面宣布（佈）」。
最後，佢再加埋「不是大和解」嘅標籤。鴿黨喺fb分享咗林卓廷篇嘢，咪當又解釋埋囉。
網民：做雞又要貞節牌坊
你可以前晚食飯、噚日反面啫，好多人都做唔出同唔認同㗎。「Ray Wong」話︰「你地（哋）收左（咗）林鄭3萬蚊wor（喎）。」
「Terence Chau」亦炮轟︰「又要做雞又要貞節牌坊之範例。和解當然唔係單方面宣佈啦，如同民主黨話自己係抗爭，都係單方面自說自話啦×你個街。次×次要人數你地（哋）投票記錄/唔出席投票記錄出嚟唱×你，醜唔醜呀高佬！」
「何正男」亦問︰「孟（曼）德拉有無同白人政權一齊食飯，收人三萬，甚至請佢地（哋）去自己婚禮？重（仲）出d（啲）咁既（嘅）圖真係噁心極。」
「Jeff Li」就挑機林卓廷話︰「你都係問下你大佬胡志偉同你d（啲）元老卿姐果（嗰）d（啲）係咪咁諗先啦，又要對抗惡人，又要同佢Hehe haha（嘻嘻哈哈）飲飲食食，真係猜不透你地（哋）囉。......我生日都唔會同d（啲）唔順眼唔fd（友好）既（嘅）人慶祝食飯啦！」
鴿黨支持者「Eling Lee」就護航話︰「你嘅生日喺（係）好個人化，人家喺（係）政黨嘅！要與政權打交道，......搞政治唔可以喺（係）咁嘅！你根本唔喺（係）食政治飯嘅。」「Kelvin Lee」就恥笑話︰「原來連啲fans都知食政治飯大過天。」
「汪容」則話︰「民主黨從來沒有做過什麼壞事，駛（使）乜要和解，民主黨只是真正比（畀）良知做事！」咁之前就唔好黐埋激進派度寫「自決文」啦，咁咪唔使俾佢哋鬧囉。 ■香港文匯報記者 甘瑜