■《蘋果日報》前晚喺facebook度出文，話「敵人？朋友？我望唔透......」，再加隻掩面表情符號，引嚟唔少果粉去鬧爆民主黨。反對派「第一大黨」民主黨眾人同特首林鄭月娥言談甚歡，被視為反對派「金主」、向來力捧民主黨嘅壹傳媒集團創辦人肥佬黎（黎智英）點諗？《蘋果日報》前晚喺facebook度出文，話「敵人？朋友？我望唔透......」，再加隻掩面表情符號，引嚟唔少果粉去鬧爆民主黨。不過，有網民就精闢咁問：「我想知蘋果日報日後點取態」、「『毒果』編輯出呢個post（帖文）前請示左（咗）你老細（闆）未？」
《蘋果》噚日講林鄭捐畀民主黨嗰3萬蚊，又話「藍絲」「由愛變恨」、又話新民黨葉劉淑儀「葡萄」，係咁轉移傷害，但其實佢哋fb第一個相關報道就係自己掩面，再慨嘆咗句：「敵人？朋友？我望唔透......」
呢個post都對民主黨有啲殺傷力㗎，一班果粉隨即就鬧爆民主黨冇骨氣。「Cindy Lee」就形容民主黨係「垃圾黨」，「Ka Yi Kerry Cheng」話︰「民主黨似乎靠唔住，香港人真係要執生。」「Shek Tim Chi」則話︰「白鴿變紅鴿已經唔係秘密。」「Charlotta Wong」︰「阿媽我好亂呀！你們是忠或奸呢？」
網民：問過你老細未？
有留意嘅人都知《蘋果》向來力捧白鴿，老鴿、乳鴿周不時都要去見肥佬黎，有班網民就食晒花生咁留言。「Alvin Lee」就揶揄︰「民主黨第一打手蘋果扮咬販（泛）民主黨，真係人唔笑狗都吠。」
「Oski Chan」就問︰「『毒果』編輯出呢個post前請示左（咗）你老細（闆）未？」「Vincent Kwok」亦問︰「對於民主黨，我想知蘋果日報日後點取態？」「William Tso」再問︰「肥佬黎捨得閂水喉未？」
「Chan Jason」就最看破世事嘞︰「蘋果×（支持者）唔好冇心機，唔好覺得灰心同失望，反正一到選舉，蘋果吹雞你咪又係含×投票？」「Kitson Wong」就寸《蘋果》句嘢話︰「唔係望唔透，係有人唔肯接受。」
咁《蘋果》都係掩個面啫，又唔係真係想踩死民主黨嘅，噚日都冇再講呢個問題，但就報道咗葉太嘅講法︰「其實對民主黨都唔好，聽講啲網民笑吽A3萬蚊買起你。」■香港文匯報記者 甘瑜