譚文豪鬧人問佢黨慶流程係「騷擾議員」，由一直撐「港獨」、中文大學講師劉正經營嘅fb專頁「無神論者的巴別塔」，昨日就發帖回帶，話公民黨幾個議員在去年黨慶就試過缺席財會投票，因此政府的做法「非常有道理」，「你條×樣（譚文豪）仲夠膽死賊喊捉賊、惡人先告狀？」
「巴別塔」回帶去年嘅5月13日，立法會當日辯論亞投行60億元的撥款議案，公民黨嘅譚文豪、陳淑莊同郭榮鏗就因為要去公民黨黨慶打點而缺席投票，「試問一個盡責嘅政府，當睇見有啲議員竟然會將會（黨）慶嘅重視程度放響議員嘅本分──開會同投票之上，咁今年政府向你呢個舊年偷懶嘅政黨詢問一下個黨慶會唔會再令你地（哋）早退唔開會唔投票，究竟有乜問題？」
帖文狠批：「譚文豪你話政府無資格向你地（哋）索取會（黨）慶流程，咁一般市民有無資格問你幾條政棍點解果（嗰）日唔開會唔投票？你同另外兩個公民黨議員，甚至再加埋同樣缺席投票嘅葉建源、尹兆堅、鄺俊宇、黃碧雲，有無向市民解釋到那（哪）怕一句點解當日唔出席會議，盡一個議員基本嘅責任？係一句都無。既然係咁，你條×樣仲夠膽死賊喊捉賊、惡人先告狀？」■香港文匯報記者 陳川