■網民寸爆慢必咩都唔使做，接受供奉又可以「緣盡」退黨。 fb圖片一個政客佛系上嚟可以有幾極致？就係退咗黨都唔話你知。黃大仙區議員譚香文前日宣佈退出「前綫」，其實呢單就冇乜人理，但曾經以「前綫」身份參選嘅立法會議員慢必（陳志全），就向傳媒話自己冇交會費幾年，已經唔當自己係「前綫」代表。有網民就忍唔住製圖出post（文）寸佢，話佢退黨都退得佛系過人，「不交會費、不講退出、不作聲明、不認留黨，緣分到了，自然就會退黨。」
話說前日譚香文發聲明宣佈退出「前綫」，多謝甄燊港夫婦多年嘅幫助，表明自己以後係獨立民主派。點知佢煞有介事咁講完，先發現呢個世界有人可以無聲無色咁退出，講緊嘅就係慢必。
譚香文「認真退」 陳志全「等緣盡」
譚香文噚日就喺facebook出post寸慢必︰「原來退黨可以唔使開聲、唔使出聲明公開交代，只要唔交年費、唔當自己係代表就得。我呢D（啲）『腦』實人就真係唔識咁退黨法，早知可以係咁，我就唔使做咁多嘢交代咁煩喇！」
真係隔住個mon（屏幕）都感受到佢道氣。網民「Zeto Cheng」就製圖揶揄︰「慢必果然係學佛之人！連退黨都佛系過人。」「Tony Choi」亦寸佢打完齋唔要和尚︰「『前綫』只係慢必居士的化緣對象，而（𠵱）家慢必已經修成正果，位列仙班有人供奉，個個月打薄（簿）出糧！而『前綫』仍未得道，還要委身六道輪迴，只怪自己慧根未夠，覺悟不足！」
「蘇達良」都感嘆政客嘅「利聚行散」，話︰「政黨是工具，是選舉的工具。」「Chin Yau Li」就借諧音話︰「前列腺移除手術。」 ■香港文匯報記者 甘瑜