只要有反智政棍，隨時都有平行世界。許智峯搶人手機仲走去「七問」私隱專員，網上都對咁嘅惡人先告狀行為議論紛紛，但點都阻唔到成班「峯粉」為佢哋偶像打氣，仲講到佢「正義必勝」咁𠻹。有網民直言︰「講講下劫匪變咗受害人！邊夠你玩？」亦都有網民索性附和佢哋嘅邏輯︰「支持許智峯，你只需要夠晒厚顏無恥，就可以死都唔辭職㗎！」
許智峯決定埋頭沙堆，當冇聽過、冇睇過私隱專員公署話政府人員記錄議員出入會議廳不涉私隱，前日仲喺fb發帖「七問」公署。一堆「峯粉」即時進入平行世界吶喊助威。「陳碧玉」大「讚」搶人手機嘅吽J「許志（智）鋒（峯）無畏無懼，捍衛香港的法治，香港人支持你！」「Sauping Tam」亦話︰「追殺佢地（哋）！」
「Edward NG」就繼續針對嗰個受害女EO話︰「個女狗仔收納稅人十幾萬人工，做朝庭（廷）偵探，許議員根本不需道歉。」「Andrew Leung」講得更激︰「監控議員的女匪諜抓一個殺一個。」
煽打倒老鴿另起爐灶
「七問」嘅後果就係燒埋佢所屬嘅鴿黨（民主黨）。「Matthew Yeung」話︰「許志（智）峯，我全力支持你及各位志同道合的乳鴿造反，打倒老鴿，或者自動退黨另起爐灶。」「Kwong Sum Cheng」亦稱︰「問得好。最（重）要問冇良心的（前主席）劉慧卿！」
不過，呢個世界有乳鴿自然有老鴿，「Chris Lee」就鬧返轉頭︰「都估『弱智豐』（許智峯）冇勇氣辭職， 為白鴿黨止蝕， 現在還想反咬人一口，轉移視線， 你真係出少句聲當幫忙！」
好啦，喺平行世界出返嚟，睇吓其他人點睇。「Cinda Lam」直斥︰「又擺（搬）龍門，咁就可以洗清你搶野（嘢）行為咩！」「Keith Lau」揶揄︰「以後老闆監視員工都等同侵犯私隱，同老細（闆）講我唔返工關你×事？」「Chuck Lai」狠批︰「要轉移對你行為嘅視線？令自己變成受害人？咁即是對自己行為毫無悔改之心 ！」
批無同理心知法犯法
「陳生生」反問︰「街上很多鏡頭，我都有權去查？」「Sunny Law」亦話︰「男人吾（唔）夠膽攪（搞），只唸（諗）住蝦女人呢樣，就知你乜為人！仲搏（博）懵轉移視線，真係大開眼界！」
「Man Chan」就狠批許智峯毫無同理心：「調轉頭你老婆俾人貼身搶電話，人渣你會唔會就咁算數呀？」「Lai Ming Kwan」亦嘆道：「佢都面皮夠厚嘅（㗎）喎，枉為人父，希望佢兩個女大之後，在職場上唔會受到這樣的侮辱，欺凌。」
■香港文匯報記者 甘瑜