■「岸伯」在fb貼咗段大概8分鐘嘅白頭佬錄音爆料。 On8 Channel - 王岸然頻道fb截圖「冇話解僱人，只係話我唔夠錢去承擔」同「唔出糧唔等於解僱」到底有咩本質上嘅分別？正常人又點會睇得透吖。話說街工立法會議員白頭佬（梁耀忠）日前俾街工員工踢爆佢係「無良僱主」，引述佢話「唔出糧唔等於解僱」、「有時間可以返嚟做義工」，之後就引發街工內訌，有人就話白頭佬嘅言論俾人「扭曲」。不過，噚日網上終於流出咗白頭佬嘅錄音，內容的確講到「有啲同事人工，我到5月31日係難以負擔」、「唔出人工，咁係咪大家可以做義工呢？」、「冇話解僱人，冇話解散勞工組，我只係話我唔夠錢去承擔」等，呢啲說話真係有良知少少都好難講到咁理直氣壯嘞。
之前街工內部為白頭佬到底講咩拗到面紅耳赤，攞錄音文字紀錄同現場抄錄版做對比，但旁人點睇都覺得佢哋講嘅嘢根本冇矛盾，只係多角度印證白頭佬嘅涼薄啫。
講咗幾日，個錄音噚日終於流出嘞。反對派評論員「岸伯」黃覺岸噚日喺facebook貼咗段大概8分鐘嘅白頭佬錄音，一開始佢就話「𠵱家事實上係出現財赤嘅問題」，仲話保留勞工組問題唔大，形容係「人嘅問題」喎。然後「無良語錄」就嚟嘞︰「我可以解僱3個人之後個組存在㗎，我解僱一啲人、我唔請一啲人或者我唔出一啲糧，個組係仲喺度㗎喎。」
有捐款先出糧 創意無限
白頭佬仲坦白咁講︰「有啲同事嘅人工，我到5月31日係難以負擔。」咁唔出糧就唔得嘅，做唔掂要解僱咪按法例去遣散囉，但白頭佬就有特別嘅睇法，話建議成立3人或5人小組去解決財政問題，仲話「如果有捐款咪出糧囉」、「如果可以解決財赤問題，所有同事都唔使離開。」鬼唔知阿媽係女人咩，但白頭佬咁嘅講法，咪即係要大家搵捐款去保住自己份工？又幾有創意喎。
更有創意嘅之後先嚟。白頭佬再重複︰「人工點出呢？呢個先係最大問題。」然後佢又話「唔出人工，咁係咪大家可以做義工呢？」、「你咪做囉，我幾時有阻止你哋啫？」總之講到尾都係嗰句，叫大家「幫手解決財赤」。
死撐無錢承擔唔係解散
全世界都要幫手，但白頭佬就唔係好想呢件事變成佢嘅責任囉。佢話，自己個議員辦事處請咗幾個同事，但佢希望唔好係議辦聘用，最好擺班同事落機構，咁就可以變成「共同承擔」，而唔係佢自己一個承擔，費事有事嘅時候大家就話「梁耀忠搵錢返嚟囉」。佢最後仲強調︰「我冇話解僱人，冇話解散勞工組，我只係話我唔夠錢去承擔。」
咁其實「唔出糧唔等於解僱」、「有時間可以返嚟做義工」，都冇概括錯吖，到底同佢番說話有咩唔同呢？ ■香港文匯報記者 甘瑜