■陳雲生指民主黨的籌款人員「遭警察截查時竟發爛渣狂罵警員，態度差劣有如爛仔，惡過陀地」。 陳雲生fb截圖反對派向來都鍾意非法籌款，已經夠晒惡，但俾警察截查時仲可以發爛渣，咁就唔係一般嘅惡。屯門區前區議員、民建聯的陳雲生近日就喺facebook貼片貼相，話民主黨喺屯門未經批准就向公眾籌款，更「惡過陀地」，「遭警察截查時竟發爛渣狂罵警員，視法紀如無物，態度差劣有如爛仔！」唔少網民都大鬧民主黨班人係「大種乞兒」、目無法紀，要求警方執法拉人，唔好畀佢哋破壞法治。 ■香港文匯報記者 甘瑜
根據陳雲生貼出嚟嘅相，個擺喺街邊嘅籌款檔位有兩三個工作人員，棟住鴿黨立法會議員尹兆堅嘅旗號。喺段十幾秒嘅短片入面，就見到有警察上前查問，其中一個着黑色衫嘅人就鬧個警察，仲對佢手指指。
陳雲生貼相 街檔插堅旗
除咗陳雲生覺得呢班人「惡過陀地」，民建聯北區支部社區幹事柯倩儀亦留言形容佢哋「目無法紀」。唔少網民都狠批呢種非法籌款嘅行為。「Hung Wai」批評︰「（民主黨）不如改名叫乞兒黨。」「Tze Ming Sin」揶揄︰「香港乞兒都勁個（過）人，香港民主萬萬歲。」
「Amy Chan」也狠批︰「佢地（哋）重（仲）衰過爛仔，我一定唔會捐款俾（畀）佢地（哋）！」
網民斥乞兒黨衰過爛仔
「Siu Hung Yiu」質疑︰「民主黨可以通街乞錢，又不用申報，咁尹兆堅係議員，點可以咁做！」「Raymond Wu」表示︰「法治社會不容任何人士假借任何組織名譽（義）未經申請籌款，以杜絕騙徒行騙 ！ 這是人權自由民主社會應要維護的法治精神！」
好多網民都支持警方嚴正執法。「Alex Chow」話︰「警察應該直接拘捕佢哋，告佢哋行騙罪！」「James Chong」表示︰「無申請？拉啦！理佢乜Q黨？執法嗎！」「Connie Tang」亦話︰「要嚴正執法，不可以比（畀）啲人靠大聲就過關！」
「Neo Lam」揶揄︰「晤（唔）比（畀）佢犯法仲得了？民主黨喎！犯咗幾拾（十）年法，你今日話佢犯法？佢哋奉旨行乞架（㗎）嘛，不過唔知奉邊個旨？」
根據《簡易程序治罪條例》（第二百二十八章）第四（17）（ii）條，任何人無合法權限或解釋而在公眾地方為非慈善用途進行籌款活動，即屬違法，可處罰款500元或監禁3個月。