■網民學反對派語氣揶揄李鳳琼︰「咩都唔寫，肯定有問題。」 fb截圖話說前日有網民抹黑話參加東區區議會佳曉選區補選嘅民建聯「小花」植潔鈴（Elaine）學歷「有問題」，《蘋果日報》即刻唱雙簧咁質疑佢，Elaine前晚已經喺facebook到澄清，仲向我哋提供咗�嘅大學畢業證書𠻹。有Elaine支持者戥佢俾人抹黑唔抵，叫《蘋果》咁得閒，不如去跟進吓反對派參選人李鳳琼個候選人簡介點解又唔寫年齡、又唔寫職業好過啦。
炒作網民抹黑 懶理潔鈴澄清
Elaine前晚回覆我哋查詢之後，再喺fb到澄清呢啲惡意抹黑，強調自己2014年喺城市大學英文系畢業，仲貼咗啲自己畢業相出嚟，叫唔信嘅人都可以直接同城大教務處查詢，「選舉理應是君子之爭，大家可以比政績、談政綱，用到抹黑、不實的手法，實非市民之福。」
佢仲充滿幽默感咁加咗「專業啲啦」、「唔係霞姨唔派飯盒㗎」、「你正正經經自己去check（查詢）啦不如」嘅hashtag（標籤），呼籲呢啲網民同媒體唔好無謂炒作。
呢啲澄清呢，《蘋果》就冇登啦，一開始「質疑」佢嘅網民「Billy Chee How Wong」就繼續懷疑，再出post（帖文）話Elaine唔貼畢業證書喺fb就「無法信納」喎，但其他網民就冇再同佢癲啦，所以篇文出咗成8個鐘，留言都冇個。
唔少網民都戥Elaine唔抵，直斥反對派「最鍾意中傷人」，「Pak Kin Chan」就貼返反對派個李鳳琼嘅候選人簡介出嚟，喺個人資料嗰度呢，佢好霸氣咁寫咗自己個名同「民主派」仲有個電郵，其他資料包括年齡同職業就一隻字都冇寫，唔通真係講句「民主派」大晒？
李參選資料只寫「民主派」
「Pak Kin Chan」就學反對派嘅語氣揶揄︰「咩都唔寫，肯定有問題。」再補刀tag（標籤）埋《蘋果》話︰「香港蘋果日報記者朋友，希望可以幫手跟跟。」■香港文匯報記者 甘瑜