反對派經常將「民主」掛喺口邊，尤其是選舉時叫得最響，但由今年立法會補選時，「自決派」嘅姚松炎嘅支持者瘋狂攻擊同樣根據「民主動力」「初選」產生嘅「Plan B」馮檢基，同「香港眾志」周庭欽點區諾軒參選，就知「民主」不過係口號嚟嘅啫。近日，傳媒報道話「瀆誓四丑」中的劉小麗計劃放棄上訴，引發九龍西第二次補選，仲欽點咗工黨大佬李卓人做佢「Plan B」。馮檢基喺回應傳媒查詢時就話，如果李卓人未經過「民主過程」而是經人直接「欽點」某人，是不能接受的。唔少網民亦狠批，出口術欽點「大佬」參選者，根本冇資格講民主。
在立法會選舉九龍西選區當選的游蕙禎及劉小麗，因在宣誓時玩嘢而被法院裁定喪失立法會議員資格。反對派為令兩個議席空缺分開補選，劉小麗就提出上訴，而特區政府亦決定先補選其中一個議席。九龍西第一個議席空缺的補選已過，劉小麗近日就向傳媒放風，話佢傾向撤回上訴，以引發第二次補選。
劉小麗自己當然想選，但擔心一旦被DQ就渣都冇得剩，為免上次補選姚松炎支持者狂轟馮檢基嘅鬧劇重演，劉小麗就搵定人做佢「Plan B」，希望其路線「千秋萬世」。
馮檢基批搞「大佬文化」
有報道稱，佢曾經屬意民協副主席楊彧，但由於民協內部對楊彧擔任「Plan B」反應未見熱烈，加上論資排輩不及另一副主席何啟明，令民協「陷入兩難」，最終未能成事。千揀萬揀，佢都係搵咗工黨前立法會議員、在「雷動」影響下落敗的李卓人擔任佢「Plan B」。
講到尾，都係唔想跟「民動」此前傾出嚟嘅機制，要欽點自己友以免議席落入其他黨派口袋啫。馮檢基昨日接受傳媒訪問時就話，如果人選是通過「民主原則」推舉出來的還可以接受，但倘有人打算不經過「初選」機制，而是用欽點方式去「推舉」某人，是「一錯再錯」的決定，將會重新提升「大佬文化」，間接令「民主的生命力」毀滅。
唔少網民都鬧爆劉小麗。「Alex Chan」道：「為自己快啲有得選，再繼續出20萬（元）一個月，即刻放棄上訴。果然為左（咗）現實放棄公義！」「劍聲」就話：「有冇攪（搞）錯，唔攪（搞）『初選』，打埋開口牌！連戲都唔交少少，政棍！」「Barry Ma」亦話：「『初選』的意義是選出『最佳』代表，小麗有乜基礎去欽點Plan B！」
「自決派」只想爭埋一份
不過，其他「自決派」嘅支持者就即時出來爭埋一份。「Jack Koo」貼圖話：「點解（『Plan B』唔係姚松炎？」「Ivan Mak」道：「若改派李卓人出選，隨時投票結果會低於劉小麗、何啟明和楊彧！」「Ben Li」就稱：「不如由『眾志周庭小姐再次出選』......好嗎？幾（機）會一定高......」
有人就揶揄唔知點解一定要搵呢啲「政壇老海鮮」而唔肯畀位新人上。「Deecheung Deedee」揶揄：「來來去去都係這班old seafood。」「Joel Yu」道：「又係李卓人，『泛民』無人咯（啦）咩？係都要搵呢D（啲）人出黎（嚟）翻閹？」
■香港文匯報記者 陳川