■片段中保安態度十分客氣，但「熱狗」都硬係要「被害妄想症」發作。 直播截圖「熱血公民」立法會議員鄭松泰（蟲泰）近日邀請消防處派出安全教育巴士去寶林邨搞活動，本來就好地地，但「熱狗」硬係要興風作浪，「批鬥」去視察嘅保安「阻止」消防人員解釋消防訊息畀市民知喎。
但一個屈尾十，有居民就踢爆架巴士停泊位有別於慣常做法，質疑係蟲泰嘅人事前無同管理公司溝通好，更惡人先告狀，將人擺上網批鬥。
蟲泰同鄭錦滿前日就邀請咗消防處派出消防安全教育雙層巴士，巴士就停泊喺寶林邨寶智樓外。睇返「熱狗」當日的直播，一名保安員當時上前視察同影相，即刻俾人出言阻止，要求他不要妨礙消防員向街訪講解。該保安員立即放下手機，退到比較後的位置，更連番舉手道歉指：「唔好意思！」
「熱狗」Chigo Fly事後就喺「將軍澳」、「大香港早晨」等facebook群組發帖稱：「寳林邨物業管理公司嚟『搞鬼』！阻止消防人員解釋消防訊息俾（畀）市民知！」有「熱狗」似乎未搞清楚件事就口出惡言，「Becky Mok」就詛咒道：「願呢間管理公司嘅人被火吞噬。」
堵唯一緊急泊位 無諮詢物管
有網民都覺得件事有輘輷，「Siegfried Lee」話：「 咁又奇，消防署冇理由冇同管理處溝通過架（㗎）照計。」「Angie Lee 」亦問：「消防冇事先同物管溝通？」
自稱是寶智樓居民的「Zeto Cheng」睇唔過眼，喺fb發帖話，該巴士停泊的地點係車輛駛入寶智樓門口的唯一通道，基本上只供救護車、警車等緊急車輛，及垃圾車作短暫停泊：「要知道寶智樓地下兩層係老人宿舍，所以不時有救護車出入，你放架雙層巴士係（喺）度，萬一有救護車要入嚟都唔知點出入？安排係（喺）寶智樓樓下做展覽嘅人，唔係無腦就係無心。」
不過，最令佢火都嚟嘅係，管理公司當時派員到現場了解，就俾「熱狗」支持者炒作為管理人員「干涉」消防巴士的畫面：「那些熱狗們如獲至寶，拎嚟放上網上各大小群組大加炒作，講到自己為居民服務慘遭迫害云云。」
他話，按道理物業管理公司不可能俾教育車喺該處停泊兩小時，若展覽教育性質的車輛通常停泊在寶寧樓同體育館之間、地方足夠放兩三部車的大走廊，質疑「熱狗」事先並未取得管理公司同意：「肯定係有人自己搵消防處搞，然後無同寶林邨果（嗰）邊『打招呼』喇。」 ■香港文匯報記者 范童