■劉慧卿fb上載咗與李卓人、何秀蘭當選照片。 fb截圖「瀆誓四丑」中的小麗老千（劉小麗），計劃放棄就立法會議員資格提出上訴，以啟動九龍西議席補選，據報更為自己一旦被DQ而搵定「Plan B」，避過所謂反對派「初選」的「民主程序」搞欽點。佢近日更「走後門」，去搵其他黨派「大佬」撐李卓人，趕絕其他派系內嘅有意參選者。所謂「民主」一場戲，其實都幾兒戲。
反對派為免自己友打自己友，所以搞個協調機制來篩選邊個先可以參選。雖然都係小圈子，但起碼都叫做吓戲，分開民調、實體投票和團體投票三部分嚟揀人。不過，今年第一次補選就搞出大頭佛：本來大家同意初選得票第二高者係「Plan B」，但出選嘅蟲炎（姚松炎）就怕自己被DQ，由朱凱廸出面狂攻原先嘅「Plan B」馮檢基，結果引發陣營內罵戰，蟲炎最終亦輸埋。
可能汲取咗呢個教訓，小麗老千就先下手為強。佢之前已經出過口術，話自己「不傾向」反對派搞初選，以免搞成三四個月先可以開始選舉工程。所謂「坐言起行」，佢近日向友好吹定風，話自己已搵定李卓人做自己「Plan B」，仲開始走定「後門」。
狂約「大佬」打矛波
《蘋果日報》報道佢近日主動約見不同嘅反對派政黨，探佢哋對由李卓人做「Plan B」嘅口風。本周三，佢就同「議會陣線」幾個「自決派」嘅立法會議員見面，話「未有對李卓人出任『Plan B』持強烈反對意見」喎。
老千嗰邊仲吹埋風，話李卓人一旦當選，「極可能」只完成餘下兩年立法會議員任期，不會「永續」參選，即係叫其他反對派政黨唔使擔心佢會乘機部署自己勢力喺立法會換屆選舉爭埋一份咁講。
唔知係咪巧合得咁交關，民主黨「普通黨員」劉慧卿昨日就喺fb上載咗第一屆立法會選舉時，仲喺前線嘅呇P李卓人、何秀蘭3個人當選嘅相，仲搭多句：「20年後的今天，我們雖不在立法會，但仍會繼續在不同的領域為香港的民主、自由、人權和法治而努力！」
「走後門」策略成功。昨晚，劉小麗就先後與公民黨和民主黨會面。公民黨黨魁楊岳橋聲稱，同意倘劉小麗參選而被DQ，可以考慮讓李卓人作為「後備」。民主黨議員黃碧雲則稱，民主黨中常委已通過向中委會推薦，支持劉小麗作為參加九龍西補選的首選，李卓人則為「Plan B」。
網民揶揄：泛民嫌議席太多？
唔少網民都忍唔住寸返幾句。「Peter Cheung」質問：「又搵你呃人？」「Rain Wong」就慨嘆：「揾d（啲）新人可以嗎？」「Chan Bing San」揶揄：「泛民今次讓半臂，嫌議席太多？」
「Rain Wong」更回帶話：「你老母，李卓仁（人）當年批准內會主席可趕走議員架（㗎）。選佢有冇傻×左（咗），使唔使找數呀？小麗！」「Rachel Hung」則道：「311補選個（嗰）日，行街見到劉小麗企街邊用大聲公幫劉（姚）蟲炎拉票，結果蟲炎就輸左（咗）。」 ■香港文匯報記者 陳川