■有網民回帶，話劉小麗前年號召小販去旺角，是旺暴的元兇之一。 fb截圖香港文匯報訊（記者 陳川）小麗老千當「初選」機制冇到，走後門搵其他反對派「大佬」閂埋門幫佢個「Plan B」李卓人加持，以為反對派支持者一定買賬？你哋真係以為啲選票係你哋嘅咩！有蟲炎（姚松炎）嘅支持者就話應該由蟲炎出來選，有人就話點都應該係馮檢基做「Plan B」，有人就話應該畀其他年輕人參選，而唔係畀啲老海鮮「永續參選」咁話喎！網上爭拗持續，睇嚟遲早又有一場大龍鳳。
阿人老馮「永續參選」
小麗老千日前喺記者會上正式話反對派已確認李卓人係九龍西補選嘅「Plan B」，網絡間即時群情洶湧。「Kee Cyk」狠批：「欽點？其它（他）人冇得玩啦，又話民主嘅？」「Duncan Wai」質疑：「點解唔做一次『初選』，大家投咗邊個出，好過幾個老千出口術。」
大家係咪當馮檢基冇到？「Chris Wong」就話：「點解唔推薦基哥？上次你班友搞死基哥今次點都要還返基哥公道！」「Wing Cheung」就反駁：「上次系（係）基哥小氣牙（呀）！」「Zoe Fong」反唇相譏：「上次係朱（凱）廸同炎炎打茅波，攪（搞）死基基，佢先至嬲嬲豬！」「Yves Lung」直言：「（『民主動力』）收左（咗）人8萬5（「初選」費），唔比（畀）人去選，重（仲）話人小氣，果然扮民主派都係無×恥！」
有人就念念不忘喺九龍西補選時落敗嘅蟲炎。「Jack Koo」稱：「姚係被DQ其中一個，上次只輸2千多票，如今次參選有多少改善必定會贏。」「Ding Steve」就揶揄：「姚老頭早啲瞓啦，上次佢破壞民主制度DQ選民用票決定的Plan B，結果趕走馮檢基啲選民喎，仲×唔夠咩！」
「Richard Lau」就認為就算真係要「Plan B」，都應該係後生仔：「點解唔比（畀）後生上位，要尼（呢）Ｄ（啲）老油條？」「Ivan Mak」就話：「建議改派民協二名副主席楊彧或何啟明出選，若派李卓人出選隨時選票會低於姚松炎！」
「Mak Jolene」就直情覺得小麗老千都冇資格選：「佢好多蝦碌嘢。做議員×成咁，肯投佢票的 ，應該也不遑多讓矣！」咁小麗做過咩？不妨回一回帶：佢喺去年立法會會期一開始唔夠半年就不斷做錯嘢，包括喺11月8日舉行嘅發展事務委員會會議期間，佢走咗去接受電台訪問而缺席成立跟進橫洲風波小組委員會嘅投票。
小麗衰嘢多受質疑
兩日之後，民主黨議員林卓廷喺大會提出引用特權法調查廉政公署人事變動動議，佢就只按「出席」鍵而趕不及按「贊成」鍵，令地區直選票數僅差一票而未能過半數。
僅過多一日，佢喺保安事務委員會睇錯立法會秘書處提供的背景文件，話對政府設立禁閉營收容難民的建議感到憂慮，結果被時任保安局局長嘅黎棟國寸爆話個建議係由其他議員提出，文件根本冇呢句。
「正常」咗幾日，佢喺11月21日嘅政制事務委員會討論《本地報刊註冊條例》時，突然發言話要傾有特首選委候選人被裁定提名無效的問題，被批評搞錯議程。又喺兩日後，「監察西九文化區計劃推行情況聯合小組委員會」舉行首次會議，佢喺投票選正副主席時高呼「扱錯印」而要換選票。
有網民亦回帶，話佢前年號召小販去旺角，是最終導致旺角暴亂的元兇之一，點解「本土民主前線」前發言人梁天琦等人紛紛被判監，而佢可以走得甩喎！■香港文匯報記者 陳川