本來唔吹咁大就冇事嘅，但反對派成日話「關鍵一席」、「必死覺悟」，到表現不似預期，俾自己人鬧都梗㗎啦！繼缺席工務小組後，又有反對派議員缺席投票被鬧爆。早輪，林卓廷喺立法會內務委員會提出「就升降機維修保養對市民安全的影響進行辯論」議案，結果，同黨嘅胡志偉、涂謹申、尹兆堅，仲有梁耀忠、郭家麒、葉建源、區諾軒7個人缺席，令議案再次「反勝為敗」喎！
由撐「獨」嘅中文大學講師劉正經營嘅「無神論者的巴別塔」fb專頁，話呢個由林卓廷提出嘅議案，結果以22票贊成、28票反對而被否決，「但係『飯（泛）民主派』議員竟然有7個缺席？咁咪即係如果佢地（哋）全數出席，呢個議員（案）咪會以29票贊成、28票反對被通過囉！」
佢質問呢7個反對派議員當時「究竟去×咗邊」，「有無向市民交待（代）缺席原因？然後點解所有『飯（泛）民』大台支持者全部都視而不見，任由佢地（哋）繼續偷懶落去、照逗九萬八一個月人工？」
佢仲將矛頭直指林卓廷作為議案動議人，「民主黨響內務委員會入面嘅6個成員有一半缺席投票，你老×連自己嘅黨友嘅票都爭取唔倒（到），咁提個議案出黎（嚟）做乜×？究竟係衝出黎（嚟）×丟人現眼，定係提個議案出（嚟）就可以拍條片拍有做嘢？咁×樣就叫有做嘢？食×屎啦唔該！」
區諾軒遊日扮在港
同樣缺席嘅區諾軒當然亦走唔甩：「區諾軒去咗日本風流快活第四日，除咗剩（淨）係識叫自己班助理繼續貼Post扮響香港同埋Delete所有質疑佢點解唔開會走咗去日本嘅留言之外，一直龜縮不作任何解釋：原來呢啲就係作為『飯（泛）民』垃圾會議員面對市民嘅方式？」
佢最後開地圖炮：「口裡說守護香港，身體卻很誠實，其實『飯（泛）民』建制本一類，分分鐘建制仲好啲，因為佢地（哋）出席率隨時高過你班垃×圾。」
反對派經常借口，話「『泛民』齊人，建制會即刻派多幾個人開會，即係點都係輸」，「巴別塔」就反駁：「咁以後唔×駛（使）投票啦白×痴（癡），仲選你入議會做乜×呀？反正都輸×哂（晒）架（㗎）啦！經已唔駛（使）你做『抗爭』，連最基本責任都想逃避，咁×無恥仲講乜×爭取民主？」 ■香港文匯報記者 陳川