著名足球評述員江忠德
世界盃如果場場都係強隊勝弱旅輸，咁就太過枯燥乏味！德國輸、阿根廷同巴西都和波，成為了茶餘飯後的話題，而且仲引伸出視頻助理裁判(VAR)的激烈討論，事關阿根廷同巴西都係受害者，今晚8點巴西在第二輪分組賽對哥斯達黎加，我會在廣東台體育頻道做直播睇實VAR仲會唔會做主角？
當出現爭拗時候，VAR確實幫到手，但係幾時用呢套系統始終都係受控於主球證的主觀因素，加上呢屆世界盃現場球迷同時在球場大屏幕一齊睇，對於球證構成沉重壓力，反而令到部分球證堅信自己即時判斷，唔輕易出動VAR幫手，所以球隊遇到邊個球證吹哨子都講運氣！
巴西上場畀瑞士摸和，如果球證肯睇VAR改判的話就贏波，但係話分兩頭，森巴兵團自己踢得曳唔爭氣亦唔值得全取三分。古天奴在20分鐘射入世界波之後輕敵，尼馬表現浮躁影響埋隊友情緒，餘下70分鐘踢唔出應有水平，希望小小苦楚等於激勵，呢場呈獻精彩森巴舞步畀球迷欣賞。
四年前世界盃好勁的哥斯達黎加變成褪色黑馬，整體實力下降，上場輸畀塞爾維亞攻不銳守不穩，今場焗攻爭三分只會暴露更多防守漏洞畀巴西有機可乘！