■各人齊齊傾吓心中冠軍，當中譚詠麟、孫耀威都睇好法國贏！香港文匯報訊（實習記者 梁敏義）2018世界盃冠軍爭霸戰已於昨晚香港時間11點上演，大批香港藝人遠赴俄羅斯觀戰，當中包括楊受成率領旗下藝人謝霆鋒、容祖兒、蔡卓妍親身飛到俄羅斯觀戰，而明星足球隊譚詠麟（阿倫）、曾志偉、許志安、梁漢文、羅家英、孫耀威和陳美詩等齊齊欣賞終極之戰！賽果到底是法國隊還是克羅地亞奪冠？好快就揭曉。而人在俄羅斯的羅家英眼光獨到，前日買中英格蘭0:2波膽，至於冠軍戰，譚詠麟、孫耀威及楊受成都睇好法國贏！
早前曾志偉現身ViuTV講波令網民大感驚喜，日前佢仲跟隨ViuTV帶領明星足球隊到俄羅斯現場睇波，而無綫藝人汪明荃（汪阿姐）及馬海倫都有跟隊。阿姐不停在社交網上載多張相，見佢不停同老公羅家英合照，又見到譚詠麟、梁漢文、劉浩龍、張兆輝、泰迪羅賓、孫耀威和陳美詩等，玩得非常開心，仲順道周圍遊覽。
眾人又特意拍片講到前晚比利時對英格蘭場季軍賽，其中阿倫更大讚家英哥醒目，因聽老婆（阿姐）話而贏了波膽，譚泳麟說：「家英哥你眼光獨到，噚日贏晒波膽喎。我們代人高興，only you only you。」家英哥說：「講你聽啊，呢D嘢要聽老婆話。」阿姐此時即話：「我叫你買2比1㗎！」
家英買中英格蘭波膽
家英哥補充指阿姐對英格蘭有情意結：「唔想他們輸得咁慘，但我就覺得贏就要贏到盡，所以買咗2比0，最後咪中咗波膽囉！」及後阿姐再講到克羅地亞對法國冠軍大戰時，她則捧買紅白球衣的克羅地亞，但家英哥竟然夠膽反對，並說：「反對！我買法國贏！」此時剛有一位穿着克羅地亞球衣的外籍人士經過，他們就請對方埋嚟一齊講吓「心水」，羅家英說：「我們見人講人話，見鬼講鬼話，有隻鬼係度(指外國球迷)。其實我都話法國贏。」最後，阿倫就表態：「我買2比1法國贏！」
孫耀威讚莫斯科非常乾淨
第一次到莫斯科的孫耀威則表示：「Yeah，發覺莫斯科非常之乾淨，好有呢個世界盃的氣氛。」孫耀威又表示因為今日（昨日）係final啦 ，好多人着住球衣，個邊仲有人踢緊友誼賽。至於支持邊隊，陳美詩說；「法國。」孫耀威：「咁我都支持法國啦！Yeah！」
楊受成一直力捧法國隊
愛足球之人楊受成多年來一直力捧法國隊，雖然兩年前的歐洲國家盃，法國隊與葡萄牙隊對決爭冠軍時，法國隊輸給了葡萄牙，但他仍然繼續支持法國隊。
楊受成坦言：「我是法國的忠粉，其中一位10號球員基利安麥巴比只得19歲，速度快、腳法又好，相信在5年後他將成為未來的球王，所以我在這次世界盃決賽法國大戰克羅地亞中，一定是支持法國。」