■小麗老千影呢輯相，俾岸伯質疑係偽基層真中產。 王岸然頻道fb截圖文青療癒風格只係年輕人嘅專利？開晒口有意出選立法會九龍西補選嘅小麗老千（劉小麗），就用實際行動話畀大家知，即使係四張嘢嘅中女都有權行清新小確幸路線，不過就俾人恥笑到面都青埋啫。話說小麗老千近日採用文青風嘅宣傳伎倆，以「守護平凡的幸福」為主題，諗住老中青通殺，結果就連親反對派嘅時事評論員岸伯（王岸然）都頂唔順，日前話佢嘅宣傳手法上已經反映佢係離地中產，所謂「平凡的幸福」對於九西為數唔少嘅基層市民係黑色幽默，分分鐘難聽過粗口！ ■香港文匯報記者 何西
小麗老千前幾日喺fb上傳「擇善堅持 守護平凡的幸福」為題嘅帖文，配上一張文青風宣傳照，內文寫住「我相信不少人和我一樣，相信幸福就是平凡，就是日常：和自己摯愛親朋在一個安樂窩生活，談天說地，或靜靜地看一場戲，聽一首歌」，配上「守護平凡的幸福」等嘅標籤（hashtag），真係爭杯咖啡就做到中產。
正所謂「人唔笑狗都吠」，見到小麗老千嘅最新出千伎倆，連見盡風浪嘅岸伯都頂唔緊，喺fb度發炮，話從張宣傳照嘅設計，已經睇出有樓喺手嘅小麗老千係離地中產，「形象呢家嘢，可謂相由心生，你係什麽（麼）階級，就自然有什麽（麼）口味，裝扮可以騙人於一時，終於會露出本來面目。」
話平凡是福 不知基層苦
岸伯又話，九西大多數都係基層市民，講緊連食住都未照顧到，小麗老千仲叫人追求「平凡的幸福」，直情離地到加零一，「『平凡的幸福』呢句話對年青（輕）得個做字，年老全無社福的公屋居民、籠屋、劏房戶係黑色的幽默。」
可能喺小麗老千眼中，你有你繼續挨貴租住劏戶，佢有佢做議員又可以月袋九皮幾嘢，然後靜靜地看一場戲，聽一首歌囉，何不食肉糜？
見到心目中嘅「民主女神」被批評，「黃絲」仲唔衝出嚟護主？社民連黃永志就聲稱，小麗老千做議員嘅人工仲低過教書，話議員人工「得個（嗰）9萬幾（元）」咁少，小麗老千仲要「捐咗一半人工，其實得4萬幾」云云，鬧岸伯小人之心，以為小麗老千去選就係「為十萬蚊人工，唔駛（使）定時返工」喎。
岸伯之後反駁，話大學兼職講師一個月都係得萬幾二萬蚊，又冇福利，何來好似黃永志所講嘅教書仲好搵呢？佢仲暗寸小麗老千收壹傳媒肥佬黎（黎智英）錢，「原來當議員又辛苦又蝕底，難怪要秘密係（喺）肥佬處出多份糧幫補家計。真係陰公（功）啦！」
「咪投小麗等佢過平凡生活」
眼見小麗老千玩文青風格唔成，一眾花生友搞到成地都係殼。「徐玉麟」質疑小麗老千嘅文字又長又臭，岸伯其實係提佢喺（嗰）篇選舉文字離地，小確幸又好肉麻啫。「Joey Yam」就揶揄小麗老千，叫大家唔好投佢，等佢體驗基層感受：「既然佢要大家堅守平凡，咁首先到選舉嗰日唔好投佢一票，等佢同市民一樣平平凡凡咁打份萬幾蚊嘅工，過返平凡人嘅生活。」
「Mok Andy Kolice」就質疑反對派口中嘅「小麗捐糧論」：「九萬幾蚊未計辦事處預支營運開支， 個個議員都申請到上限。 我淨係見過小麗老母影嗰幾張餐券出嚟， 至於係咪個個月有用一半人工買餐券，連小麗老母自己都唔敢出嚟澄清， 居然有士兵衝出嚟，笑×死。」「Rita Kwan」就恥笑小麗老千假平凡真離地：「唔怪得小麗老母幾疊樓揸手啦，教書都個個月多嗰（過）十×幾萬加議席，發達啦！」
其實無論小麗老千嘅宣傳手法係行文青小確幸路線又好，尖沙咀大媽路線又好，做「中間超人」都好，都係嗰句：拎疊單證明你有捐份糧先出嚟講嘢啦！