後生一輩呢期興行文青風，而做得人阿媽嘅小麗老千（劉小麗）亦有意跟上今期潮流，踩過界踏足文壇小天地，近日繼接連喺facebook度投放「平凡幸福彈」，日前又喺Instagram上分享由「資深文字記者」寫嘅「小麗老詩」。驟眼睇以為首詩係讚緊小麗老千自帶高潔光環啦，點知連班反對派同路人都忍唔住要寸一寸，話首詩其實根本就暗寸緊小麗老千無料無樣無自信，老千本人仲要些牙（share）分享埋一份，真係不禁倒抽一口涼氣。唔知到底小麗老千係老花睇唔清楚人哋寫咩，抑或係其實自己內心都好認同段文字呢？
小麗老千日前喺ig上分享一段關於自己嘅報道摘錄，內容就話：「有一些女人，總是相信自己的外表、才華、事業、家庭、一切。有一些女人，總是不相信。劉小麗這個人，是在不相信中成長。」驟眼睇段文字，真係好似隔住個mon都感受到小麗老千身上嗰種文藝仙氣喎。
快必揶揄文宣垃圾
結果係點？就係一眾反對派中人紛紛出嚟恥笑小麗老千自high，以為人哋係讚緊佢，點知原來係寸佢唔相信自己，話佢無外表無才華乜都無，名副其實「小麗百無」！曾經幫過小麗老千站台嘅「人民力量」快必（譚得志）就揶揄佢，話首「小麗老詩」內容猶如垃圾文：「如鬍鬚（曾俊華）當年的『信我一個人不如信每一個人』，又如黎明的『要贏人先要贏自己』，但我最愛衛斯理的『食肉要食肥食雞要食皮』。」
神駒二創回帶走數
狙擊開小麗老千嘅「無敵神駒」仇思達都跟大隊，仲幫「小麗老詩」改第二個版本：「有一些女人，總是不相信，不相信市民並非白痴，老點市民捐一半人工、免供『全民退保』、組織義工隊，全部沒有實現。市民看在眼裡，記在心裡。至於你們信不信劉小麗，我反正就不相信了。」
一度被視為「青症」（「青年新政」）Cheap禎（游蕙禎）個「Plan B」嘅袁健恩就覺得，連小麗老千都唔信自己，憑乜要人投佢一票：「中文差，唔係好理解呢句。係咪話連自己相信自己都無？」
其實小麗老千又唔使對自己咁無自信嘅，至少喺政壇上「老千一姐」地位佢認第二，都無人敢認第一。不過想進軍文壇就不了，進修多幾年中文再重新考慮啦！ ■香港文匯報記者 何西