■小麗老千借啲意搬弄「自決」意思，諗住博過骨入閘參加九西補選，但有網民回帶返佢個「自決1.0」版本，其中講到明要捍衛「港獨」作為「自決」選項，睇嚟夆}「獨」味都幾難洗清。 facebook圖片小麗老千（劉小麗）講到明會參加立法會九龍西補選，不過有啲嘢佢就講得無咁明，就係佢點樣睇「自決」嘞，最新嘅講法係「生活上有自主、社會自強」，句嘢萬能key到放諸任何政黨都啱用。以為咁就過到選民同選舉主任骨？錯晒！有網民摷返佢喺前年立法會選舉嘅「自決1.0」版本，當時佢話「自決」就係要「掙脫基本法框架」，仲話要捍衛「港獨」作為「自決」選項𠻹，嗰陣「獨」味真係隔住個mon（屏幕）都聞得到！ ■香港文匯報記者 陳庭佳
為咗唔會被DQ（裁定提名資格無效），小麗老千早前刪咗啲佢網站嘅內容，好似係佢提到「香港人有『政治自決』的權利」、「中共對香港並沒有自有的、不需尊重香港人意願的主權與統治權」嘅大作，同埋提到「為香港爭取『前途自決』」嘅「我的信念」都刪咗，真係信念都無埋。佢回覆傳媒查詢時就話唔支持「港獨」，自己支持嘅「自決」係「生活上有自主、社會自強」，仲有佢從來都無提倡「主權自決」或者「公投」喎。
網民挖撐「獨」料 曾言「捍衛『港獨』」
查實佢呢兩年以嚟講咗咁多「自決」同「港獨」嘅嘢，邊刪得咁多吖？好似睇落成立咗無耐嘅facebook專頁「狙擊政棍小隊」，隨手就搵咗前年佢一篇「獨」到出汁嘅聲明。篇聲明仲落咗「中箭」（「香港眾志」）同朱凱廸個名，係反對DQ啱啱收咗檔嘅「香港民族黨」召集人陳浩天嘅，不過點睇都係似宣傳緊乜嘢係「自決」。
聲明提到，「民主自決」就係要超越所有對人民嘅限制，包括基本法嘅限制，以民主方式畀人民決定自身命運同香港前途，「若香港人要決定未來，自主命運和前途選項，我們不得不從『基本法是唯一基礎』的思想框架中掙脫，香港的命運應由香港人決定，而非基本法，更非北京或香港政府。」佢哋仲話定必捍衛「港獨」作為港人「自決前途」嘅選項𠻹。
曾寸蟲泰跪低 回力鏢又打臉
「狙擊政棍小隊」仲好似嫌網民唔夠花生食，整多一單：同樣喺前年選舉，熱狗（「熱血公民」）阿蟲泰（鄭松泰）簽咗確認書，無簽嘅小麗老千就寸佢跪低，話政治人物要喺大是大非嘅問題上堅守原則，「政治人物的操守，反映他在重要關頭會否為一己私利而背棄選舉承諾。他的可信和可靠程度，是市民選擇一個代議士的重要根據。」短短兩年，小麗老千嘅「自決」就由「掙脫基本法框架」、「捍衛『港獨』選項」轉到去「生活自主」，呢句真係大大個回力鏢車返落自己塊臉度！
為咗令更多人知道小麗老千點樣老千法，「狙擊政棍小隊」仲喺facebook落廣告𠻹，專頁管理員就話：「係呀，嘥咗我成80蚊㗎，請大家多多share（分享），要宣揚政棍嘅真面目，特別𠵱家就快補選！……特別嗰啲雙重標準假民主玩欽點，迫退其他人嘅政棍，必遭天譴，×街死！」
「Bambi Lam」就覺得，「Plan B」你呃人（李卓人）如果有睇呢個post（帖文）隨時偷笑緊，「佢正想執二攤！」