■繼上次露腰去搬樹之後，膠柔呢次就直踩校園騷擾學生。 fb截圖年輕人何苦難為年輕人呢？「中箭」班人雖然年紀漸長，已經俾反對派中人恥笑為「成年政棍」，但當中都有唔少學生，而佢哋似乎特別鍾意搵返啲再細啲嘅學生嚟開刀。「中箭」嘅膠柔（何嘉柔）喺早前「山竹」過後化濃妝、露晒腰，戰鬥格咁款去搬樹，呃like唔成反吸嬲，結果呢期咪改變策略，直接踩到去校園做街訪博出鏡，順便又再提返「佔中」。結果大部分受訪學生都話唔同意「佔中」，「中箭」就繼續擺段片出嚟，形容到佢哋好無知咁，等人網絡公審班學生，有網民都忍唔住爆粗留言，叫佢哋「放過啲學生啦」。
答案唔啱嘴 出片踩學生
「中箭」早前喺fb上載咗條片，以「『雨傘運動』食得架（㗎）？」為題，諗住再度炒起「佔中」刷存在感，直接踩入校園做街訪，問班中學生點睇「佔中」。可能佢哋一直以為班學生會成功俾「中箭」洗腦，誤信「佔中」冇問題，點知收返嚟嘅回應絕大部分都唔啱�哋心水。
有同學仔話「佔中」係「一啲唔好嘅記憶，對於香港嚟講，咁就搞到啲街坊唔敢出街」，又形容班人「曳」，係「一班暴動嘅人」，坦言「唔想參與呢啲活動」，其實睇完都幾慶幸同學仔冇受佢哋影響。
「中箭」搞唔成班學生，仲要問到一面屁，又點會肯罷休呢？於是就有理冇理，直接將段片掟上facebook，再話「唔同下一代講呢段歷史，唔俾（畀）下一代討論政治，真係對佢地（哋）好？」暗踩反「佔中」嘅同學，再讚嗰班同佢哋意見一致嘅人「毋忘初衷」喎。
講咁多，都係想網民畀返啲顏色反「佔中」嘅同學仔啫。「Danny Tsui」攻擊道：「依（𠵱）啲咪港豬同標準蝗蟲既（嘅）垃圾思想！」「Li Hoi Man」鬧爆：「00後真係好辣殺（垃圾）！」
網民批迫人表態食死貓
不過，都有班網民睇唔過眼「中箭」嘅低莊手段。「莫賓尼」就質疑明明有同學仔話唔了解「佔中」，個膠柔都迫人表態：「點解唔俾（畀）佢哋理解件事先問佢哋立場？大部份（分）都未知件事係點，你問佢哋立場又有咩意思？咁樣俾（畀）隻死貓俾（畀）班受訪者，仲要俾（畀）片出嚟等人label（標籤）佢哋，你哋作為一個青年力量嘅政黨，係咪想行老屎忽路線？」
「Sandy Leung」就感嘆班學生講真話都俾人公審：「只怪現今既（嘅）香港連俾（畀）意見都怕被批鬥。」「Ng Pak Kong」就叫「中箭」唔好再搞學生：「×街，放過D（啲）同學，唔好搞人喇，等人可以專心讀書啦。」 ■香港文匯報記者 何西