■為咗打卡，陳恒鑌瞓身同路牌鬥長。 片段截圖為咗打卡到底可以去到幾搏？話說立法會交通事務委員會昨日搭專車去視察香港口岸同香港連接線，其中民建聯阿Ben（陳恒鑌）就喺黨友EQ（葛珮帆）嘅「慫恿」下，直接成個人瞓喺港珠澳大橋香港連接路個「全港最長」路牌下面，咁出位仲唔成為全場焦點？在場嘅人喺隔籬梗係都睇到哇哇聲啦！
喺EQ嘅facebook直播中可以見到，阿Ben伸直對手，連運房局局長陳帆都「出手」幫佢拉直對腳，諗住同個路牌「鬥長」，結果都係爭小小先夠個路牌咁長，估計路牌長度超過兩米，真係名副其實嘅「全港最長」喎。不過，如果瞓喺度嗰個係佢黨友「高佬」何俊賢，成件事可能會唔同晒！
民主黨黃碧雲亦有喺路牌度留下倩影，雖然佢就冇阿Ben為咗打卡去到咁盡，但佢隨便擺嘅姿勢已經散發濃濃嘅大媽味，算唔上「人比花嬌」，但假假哋都可以叫做「風韻猶存」嘅。
■香港文匯報記者 何西