■神駒發帖，狠批李卓人宣傳車阻街。fb圖片立法會九龍西補選候選人、工黨李卓人繼早前宣傳車衝後燈，再加埋喺行駛中嘅開篷車打開車頂捐個人出嚟嗌咪後，再被揭發違反交通規則。有市民就拍到李卓人嘅宣傳車喺沐虹街附近停留長達5分鐘，阻住後面嘅巴士前行。咁都不特止，架宣傳車更喺的士落客區故意停留，播放宣傳聲帶。唔少網民見到李卓人花式違規，都忍唔住用佢自己嗰句寸返佢︰「又話絕不容許事件再次發生既（嘅）？」
「跪完照舊 有特權大×晒？」
李卓人架宣傳車早前被揭發公然衝紅燈後，佢個「團隊」都向公眾跪低道歉，仲搞咗場大龍鳳的咗個涉事司機去警署「自首」。當時阿人「團隊」話佢哋「責無旁貸」，會「一力承擔責任」，仲揚言「絕不容許事件再次發生」𠻹。
不過，事隔數日李卓人又繼續知法犯法，「無敵神駒」仇思達噚日就話有益友報料，順手喺facebook貼咗幾張李卓人宣傳車嘅相，一張就見到架車喺沐虹街路口阻住後面架巴士，另一張就霸住的士落客區喺度停車。
神駒質問︰「李卓人宣傳車在沐虹街附近停留長達五分鐘，嚴重阻礙後方巴士前進。此外，該宣傳車又在的士落客區故意停留，播放宣傳聲帶。李卓人係咪有特權？李卓人係咪大×晒？」
曲：無話唔阻街同嘈生晒噃
網民「Chow Man Bo Chow 」就揶揄：「又話絕不容許事件再次發生既（嘅）？」神駒就率先幫阿人「解畫」︰「可能係指不容許衝燈再次發生，無講過不容許違泊同阻街。」「Raphael So」就推測李卓人團隊下一步行動話︰「之後又係帶同司機一齊去警處（署）自首。幫佢揸親車都冇好下場，要為你『泛民』犧牲。」
「Enoch Hui」批評：「無恥到咁真係第一次見，違泊之餘仲散播噪音擾民仲覺得自己大曬（晒）咁。」益友「Terry Tse」亦話︰「靠佢守護香港？佢連道路安全都守唔到！」
「YuHin Ho」就好奇一問︰「神駒，我想問下牛肉乾可唔可以計落選舉開支度？」呢個問題又真係幾值得思考，畢竟佢咁樣花式違反交通規則，食牛肉乾都係遲早嘅事。 ■香港文匯報記者 鄭治祖