■戇橋咁落力反大橋（上），摑到袋巾梁口腫面腫。 fb截圖到底班反對派可唔可以睇清楚形勢先對外開火？到頭嚟大大隻回力鏢車落自己友度，都咪話唔肉酸！今次就到公民黨黨魁戇橋（楊岳橋）嚟一次完美示範。話說港珠澳大橋前排開通，身為反對派大佬之一嘅戇橋當然乘機抽水，話佢哋拉布係阻住建制派搵食，點知就俾「無敵神駒」仇思達正面抽擊，回帶返原來公民黨主席袋巾梁（梁家傑）曾表明公民黨支持大橋。戇橋咁有心請老叔父食回力鏢，呢啲咪係愛囉！
戇橋日前喺facebook發文，諗住回顧吓班反對派嘅「英勇史」，就話拉布阻撥款係阻人搵食，仲要標籤（hashtag）「阻住班『保皇黨』搵食」。
被踢爆公民黨撐建大橋
講就兇狠，做就......神駒就正面抽擊，回帶返原來袋巾梁曾經公開咁講：「公民黨一直以嚟喺立法會撥款度都支持興建港珠澳大橋。」神駒仲話：「楊岳橋踢爆公民黨原來是『保皇黨』，因為公民黨一直以來都支持興建港珠澳大橋。 」大大隻回力鏢車落自己友度，到底戇橋係戇直定係點呢？
見到戇橋咁樣玩大踢爆法，網民梗係都加把口啦。「梁敏耀」就恥笑戇橋唔畀面黨入面啲老叔父：「楊岳橋師父好似係梁家傑，打自己師父咀（嘴）巴！」
「Choi Wai Hung」就揶揄：「摑到公民黨口腫臉（面）腫！」「Enoch Hui」亦都話：「呢句由佢呢種世界仔講出口好正常呀！摑自己個黨一巴啫！」
本來撐大橋係應該嘅，但做人呢，就唔好擺來擺去。戇橋一時撐大橋，一時又「華麗轉身」，咁搞法真係難分真與假喎，按照反對派嘅邏輯，唔知戇橋係人定係鬼呢？■香港文匯報記者 何西