■「JoJo Wu」踢爆長毛個深度遊疑似唔夠人報名而要收檔。 fb截圖社民連長毛（梁國雄）自從被DQ冇得月袋九皮幾後，就想改吓人生跑道，轉戰扮專家帶人去遊古巴，15天行程每人盛惠六萬二千八，真係啖啖人肉饅頭夠晒和味，但個如意算盤似乎就響唔到啦！有人踢爆長毛古巴團個網站已經被刪，於是要瘋狂恥笑長毛個團疑似報名人數不足而要含淚收檔。
雖然阿哥成日都話自己大把票唔稀罕班傻仔投佢票，但團友同選民嘅數字有好大落差喎，唔知長毛之後會唔會叫吓班蛤蟆去報團呢？
話說之前有間主打深度遊嘅旅行社開咗個團，話年底帶人遊古巴，「聯同隨團專家長毛，一同踏進這共產革命者的天堂」咁話。
不過，呢個團行程雖得15天，每位就盛惠62,800蚊，真係唔使去動物園都見證到咩嘢叫「獅子開大口」！
有長毛成六皮嘢「不了」
不過，正所謂天氣不似如期，長毛嘅高質深度古巴遊似乎就開唔成啦。香港文匯報「忠實讀者」「JoJo Wu」就喺fb發帖踢爆長毛：「帶隊嘅古巴團，疑似因為報名人數不足收咗皮......無長毛先$38000，有長毛成六皮嘢，不了。」
「陳永仁」留言揶揄：「咁多選票都成唔到團，陰功。」「Leung Tak Man」亦寸爆：「咁×貴，你估饅頭雄真係咁有市場得咩！？」「Milk Tea」就恥笑：「長毛自己都覺得嘥時間啦，去咩古巴。直接捐錢俾（畀）長毛抗爭基金最實際。」
唔少人就用返長毛最鍾意用嚟鬧人嘅「金句」嚟恥笑吽C「無敵神駒」仇思達就叫長毛：「收啦，收呀！嘥時間。」
「福明」亦話：「你有團？我唔要呀，傻仔！」
可能長毛帶嘅團真係太有深度啦！結果搞到成班腦咁細嘅人都唔敢報，想收人6皮變咗最尾係自己收皮，唔知阿哥遲啲會唔會又轉番去老本行叫人入錢入錢入錢呢？ ■香港文匯報記者 何西