被卿姐（劉慧卿）「視同己出」的民主黨新界東立法會議員林卓廷真係叻仔嚟，單講以一人之力搞到近六十人退黨已經唔講得笑。卿姐昨日被問到有關問題時，就話自己「幫理不幫親」，又讚林卓廷做事勤力咁話喎。
早前退出民主黨的59人中，唔少都係卿姐由「前綫」帶過去民主黨嘅人。卿姐噚日就話，民主黨係「無大無細，無上無下，人人都平等」，所以唔應該用「我帶佢哋過嚟民主黨」嘅字眼，又話「前綫」同民主黨合併後，就只得返民主黨，「競爭到咪有得選囉！」
佢話自己當年加入民主黨後，蔡耀昌、李永成曾先後做過民主黨副主席，柯耀林亦曾經做過中常委，唔存在任何民主黨排斥「前綫系」嘅人咁話，但「政治係講實力嘅」，要做出成績先至會得到官員同傳媒重視，「林卓廷係勤力做嘢。」當年，民主黨曾經叫柯耀林同蔡耀昌等去北區做，但兩個人都唔肯，最後林卓廷「迎難而上」，落戶北區，「無人做，咪佢做囉。」
就退黨者公開批評林卓廷人格卑劣，卿姐就話自己對呢樣嘢搲晒頭，仲話傳媒唔應該無證無據就將對退黨班人講嘅嘢照單全收喎，佢仲話，退黨班人冇聯絡過佢，「佢哋無搵過我，我搵佢哋？搵佢哋嚟鬧呀？係咪鬧林卓廷才算主持公道？」
副主席羅健熙就承認，呢次退黨潮的確對佢哋喺2020年立法會換屆選舉帶來一定嘅影響。另一副主席尹兆堅則指，該黨曾多番挽留早前退黨的成員，又認為林卓廷嘅形象「較為強硬」，所以難免給人較「倔」嘅印象喎。 ■香港文匯報記者 鄭治祖
