■一見有得做文章，范國威急不及待就share。留意佢share嗰時仲未有「圖片可能經惡搞」呢句。 范國威fb截圖反對派為了爭取政治本錢，經常歪曲事實。「新民主同盟」立法會議員咖喱飯（范國威），昨日就轉發一張照片，相中顯示港鐵的機場快線站，將Merry Christmas（聖誕快樂）串錯成Marry Christmax。佢成班支持者就梗係如獲至寶，猛話咩證明咁大間公營機構連英文字都唔識串啦，香港已經「大陸化」啦咁。不過，有網民一睇張圖，就知啲字係P嘅，揶揄咖喱飯等人炒車。
不過，咖喱飯連查證都唔做就轉發，其實未必係蠢，而係想跟得唔貼嘅人信以為真，「三人成虎」啫！
反對派經常以偏概全玩誤導，例如香港機場內明明同時寫有各國文字嘅聖誕快樂，中文亦有繁簡兩體，但有反對派中人就故意只影簡體字部分，然後就亂噏話成個機場都係得簡體字，話咩「有人要消滅廣東話」之類嘅廢話。
不過，黃絲嘅思考邏輯，就係單細胞，連問都唔問就信。
指串錯「Christmax」起哄鬧
可能因為了解自己啲支持者嘅特質，所以班反對派議員就連查證都懶，明知可疑都share（些牙）住先，博支持者唔覺唔覺，信以為真。咖喱飯昨日轉發咗一名叫「李察」嘅fb嘅照片，照片中係港鐵嘅機鐵快線的橫額，將Merry Christmas（聖誕快樂）串錯成Marry Christmax。
張相嘅P圖痕跡明顯過明顯，但反對派支持者嘅特質就係「不要問，只要信」，成班咖喱飯嘅支持者就起晒哄。「Blair Lee」聲稱：「97後香港淪落如此！」「York Tam」就話：「請哂（晒）啲大陸人做，正常呀。」「Polly Cheung」則聲稱：「 真的大陸化！」
陸頌雄一圖踢爆係改圖
張圖實在假得太離譜啦，唔少網民都提出質疑及批評（見表）。工聯會立法會議員陸頌雄亦發帖踢爆：「睇返張相，英文字透視有問題（參考線表示正確透視），即係啲字有可能係後加。跟住用記事本格式打開，可以睇到一堆亂碼中出現『Photoshop』字眼，表示張相真係P過呀！」
港鐵放相澄清 譏勿跟太貼
港鐵亦喺fb發相，證明張橫額寫嘅係「往市區列車 Trains to city」，仲喺文中寫：「看圖不解釋，Merry Christmas!」仲標註咗「請保持安全距離」等句子。 ■香港文匯報記者 陳川