■容祖兒香港文匯報訊 容祖兒2019年全新廣東主打歌《一種永遠》MV昨日出街。今年是祖兒入行二十周年，她希望透過全新歌曲迎接今年年中的演唱會。《一種永遠》正正呈現祖兒當下的心態，特別是歌詞方面，令祖兒回想起堅持二十年的夢想歷程，「喺呢個過程裡面要經歷過唔同嘅磨練、長大，都係唔容易，我唱呢首歌嘅時候都係有一種激情，同埋希望自己可以飛得更加遠、更加高的感覺。」
MV於台灣拍攝，導演找來曾奪得台灣金曲獎「最佳音樂錄影帶獎」的比爾賈操刀，他希望祖兒有一個「超現實」的演繹，而祖兒就希望出來的效果除了畫面靚，還會以一個故事形式帶出她一路走來的經歷，祖兒說：「導演諗咗個超現實嘅故事、一啲穿越嘅感覺。MV一開始有個小妹妹，喺好耐以前灌溉一個音樂嘅種子，將好多心機、心血擺喺泥土入面；而我係未來嘅人，回到過去，然後就同個小妹妹有啲交流。」
拍攝當日，祖兒除了要着住一件重量級的珠片衫，還要全身搽滿閃粉，搞到她成個人硬晒，她笑說自己好似一隻着咗鞋的狗仔，「因為我要黐啲閃粉落去兩條手臂，好『立』，好多唔同層次嘅閃粉，個頭又落咗好多gel，條裙又好硬，所以我𠵱家就好硬，哈哈。另外仲有一個shot好似驗眼，又係要我成個人硬晒定晒，哈哈。」拍完第一個shot後，祖兒已經勁感動，並表示回憶回來了。祖兒稱除了件衫有些重和閃粉搞到硬晒，其實個MV都拍得幾舒服，「好多時候都係坐喺度、瞓喺度甚至乎最大嘅動作只係打開隻手。不過導演一個好精心嘅設計令我好震撼，好完美咁將我想要嘅畫面呈現咗出嚟，好多謝導演嘅安排，我都好期待呢個MV。」