■兩位天后都好開心工作路上遇到大家。香港文匯報訊（記者 李思穎）容祖兒《PRETTY CRAZY JOEY YUNG CONCERT TOUR演唱會》前晚踏入第三場。當晚祖兒請來曾經在樂壇被視為競爭對手的楊千嬅擔任嘉賓，兩人合唱了《假如讓我說下去》及《連續劇》，令全場觀眾開心到飛起。
祖兒介紹千嬅出場時表示，「人生像一場競技賽，我的跑道上有很多同我一齊跑的跑手，有一些跑手同你距離特別近，大家都叮噹...... 一時你跑快啲，一時我跑快啲，今晚嘉賓佢同我一路跑住，喺我歌唱生涯上，如果我沒有遇上佢，我未必有這樣的速度跑咁快。今日我同佢雙劍合璧，希望曾經有一刻我都畀過佢好大動力，令佢跑得快啲！」繼而兩人一同合唱《假如讓我說下去》。
千嬅笑說：「你差啲整喊我！你現在講嘢叻咗喎，好開心喺工作路上遇到你，我可以見證你每個階段的進步，同埋睇住你一路成熟，你學懂怎樣表達自己。其實一個歌手最想做到，就係將自己唱的歌，用心去表達到畀大家知道，而大家又接收到，尤其雙子座，好介意人哋明唔明白佢，無人知道但我知......」祖兒說：「係呀係呀，你點解會咁知㗎？」千嬅說：「因為我個仔係雙子座呀！作為一個歌手，二十年不長不短，二十年更加係一個女人最緊要時間，我都好感謝你路上畀到好多動力我，以前我哋唔係好多機會相處，好多嘢我都冇同你分享過，見面成日都係『 HI, BYE』 ，但係最近嗰十年，大家見面機會多咗，溝通時感受到大家都互相成熟咗，人生路上難得遇到好對手，會令自己進步！所以你唔好多謝我，我應該多謝你先真。以前我哋喺頒獎禮、叱咤台上台下，真係有好多好令人懷念片段。好開心分享你這一分鐘成功。」
與胞弟紅館合唱
祖兒聽到千嬅這番說話竟接不上來，笑道：「你睇千嬅真係好勁，佢喺度我係唔使講嘢。」然後祖兒又話，「聽講有首歌你都好like，所以我哋特別揀來唱，大家真係要多謝千嬅，唔係佢真係聽唔到呢首歌。」千嬅就接住話：「我like，唔like我唔會來啦！人生就好似連續劇，雖然無人能編寫自己劇本，但我好開心今晚同祖兒一同編寫這首歌的回憶，送畀大家《連續劇》。」
到祖兒坐飛船升上半空跟山頂觀眾大唱K時，見到自己胞弟坐在山頂， 即叫工作人員將咪高峰給弟，兩姊弟一同大合唱，祖兒更開心大叫：「我終於又完成我另一個心願，喺紅館同我細佬大合唱呀！」
此外，英皇昨日正式公佈有關持8月5日場次門票的觀眾，均可用作補看8月12日的特別場，如持有當日未使用之完整有效入場門票，亦可作退票退款安排。