■伍允龍再同好友安志杰合作。香港文匯報訊（記者 梁靜儀）伍允龍與安志杰及吳建豪十六年前因合作電影而認識，最近三人再次合演電影《潛行者》，日前伍允龍與安志杰接受訪問，談起往事感觸良多。
伍允龍與安志杰接受訪問時，談到十六年前拍攝電影《少年阿虎》時，他們與吳建豪三人首次合作，在屯門拍攝等埋位期間，談到日後再合作拍電影的計劃，估不到今次他們又去返同一個地方拍攝。伍允龍說：「我們都受八十年代嘅電影影響，睇到成龍大哥、洪金寶大哥同元彪大哥啲戲有動作又有喜劇成分，我們都想做呢類型電影，今次我們仲去返同一個位置拍。」
身為演員兼動作導演的伍允龍，不諱言與兩位好兄弟合作少不免會有意見不合，問到誰讓步？他笑說：「梗係我讓步啦，我都有問佢哋想拍乜嘢動作場口，吳建豪揀咗蝴蝶刀，安志杰就話要玩槍，我就打拳頭交多，(你最辛苦？)大家都辛苦，以前都有幫人設計動作，有啲構思未必有機會用到，今次可以將呢啲構思加返入去。」
安志杰被問到對首次擔任動作導演的伍允龍有何評價？他大讚說：「對我來講，佢唔係新手，由武師、替身、演員、動作演員到𠵱家係producer成績非常好。」談到最難忘的場口，安志杰表示最喜歡自己的槍戰場面，雖然只得分零鐘，但睇返都覺得拍得靚，這場戲拍了兩take就完成。伍允龍則覺得吳建豪玩蝴蝶刀那一場打得幾好睇，自己都好鍾意。
問到可會再合作，伍允龍透露他們已有其他故事想拍，但需要投資者及觀眾配合：「希望唔使再等十年才與兩位兄弟合作，十年後腳都踢唔起啦。」 化妝、髮型：Shirley Lee（伍允龍）