潘書韻稱捐贈物資被兜售 爆完對家私隱即被兇
唔少煽暴派喺黑暴期間不斷為黑衣魔提供暴衝物資，有人就乘機「發大財」，經常因財失義。南昌北候任區議員劉家衡的「港獨女友」潘書韻，近日就聲稱另一「港獨」分子何卓為將佢捐出嚟嘅物資攞去賣，係食「人血饅頭」，仲將對方真實姓名、電話地址甚至身份證號碼放上網，佢嘅「支持者」更話要何卓為做「空中飛人」。搞到另一個一直為黑衣魔提供物資嘅人走去同佢罵戰，話佢屈人，要求同佢「對數」。結果，潘書韻就話自己俾人恐嚇，話有人要搵「勇武手足」對付佢同劉家衡，搞到七國咁亂。 ■香港文匯報記者 陳川
話說喺中文大學中文系畢業後，與另一「獨」人、中大學生會前幹事黃于喬成立咗間補習社嘅潘書韻近日喺fb發帖，話自己喺修例風波期間派物資畀啲學生同手足，後來因為有「藍絲」上門騷擾，所以將「總值至少4、5萬」嘅「極大量文具（gear）」委託「朋友」、自稱「前線勇武」嘅何卓為（Lukas Ho）幫佢免費派畀學生，「誰知後來得知佢疑似將我嘅『文具』混合佢嘅轉賣促銷，更向我介紹過去嘅學生銷售我捐出嘅『文具』。」
潘粉急護主 謀掟對方落街
佢話何卓為咁做「已經唔係呃我錢咁簡單，你係呃前線出去打仗嘅小朋友......最後嘅請求就係要佢交還返我哋送過去差唔多數量嘅gear，同埋收咗啲學生嘅錢，麻煩退還畀學生......唔知佢用呢樣嘢賺咗幾多錢，我只係希望啲嘢可以去返有需要嘅人手上，而唔係俾（畀）啲人飲酒媾女洗（使）晒。」
唔少潘嘅支持者留言，話要「私了」何卓為。「Regin Liu」話：「明知前面勇武打起上嚟唔係人咁品，佢仲搞呢啲嘢坅Y咪想俾人打，你唔好俾（畀）我見到你見一鑊打一鑊！」「Kam Wai Fok」更道：「呃呃埋埋d（啲）錢等佢用嚟做身後事，見×到佢要佢做空中飛人！」
不過，有人就覺得潘書韻咁樣「出賣自己人」唔多妥。「Martin Chan」話：「四五萬（貨）？會唔會已經派晒啊！四五萬貨，認真，大愛d（啲）派出去，一次遊行都派晒喎。」「白偉洛」亦道：「呢個巴打有派裝俾（畀）我朋友，佢做過咩唔方便講，但前線手足一定知佢做過咩，無需要貪你d（啲）裝仲要俾你咁（人格）謀殺......」
對家同道幫腔 批潘網絡公審
「Rebecca Ho」就踢爆：「成件事係：五飛成本價賣豬咀（嘴），你比（畀）一批佢免費送，你果（嗰）批送曬（晒），但仲有人需要，佢先話自己果（嗰）批要錢炸（咋）wo（喎）。」
宣稱唔係何卓為同夥，但就有向黑衣魔提供物資甚至幫人走佬去台灣嘅張家俊就特別勞氣，連發多帖狠批潘書韻：「人哋原價賣嘅係自己入多咗嘅貨套現俾（畀）恆（恒）常開支，律師都要交租啦，個倉李+×送嘅咩！」更自爆：「我送走啲細路去某國已經冇cashflow啦，原價入原價走都要俾佢公審！」
張家俊喺另一帖就話：「有冇數可以對到點樣賣到四萬幾五萬......佢（何卓為）私底下俾（畀）錢入嘅先有拎出去賣過，仲要有晒單自己幾錢買咗幾多隻。幾錢買，就幾錢賣，賣果（嗰）啲仲要上佢倉度買一送N咁隊啲多咗嘅物資俾（畀）細路。你響fb開火，我都想響fb睇睇inventory出貨條數，我哋都唔想老屈你哋明明俾（畀）咗廿幾三十萬貨又講到淨係收咗兩萬蚊貨咁。」
「Michael Or」亦話：「各執一詞拗緊，然後姓潘嘅自己都冇確鑿證據就開人哋樣、名、電話、地址，用自己班狗公恩客散播出去，差在未報警。同篤灰有咩分別？自己俾人搞唔敢派裝就推個波俾（畀）人，然後又要唔信人。咁××街賤格就唔好搶道德高地啦，除非唔係有心，不過咁×蠢就真係唔好落手落腳支持抗爭，害死唔少人。」
潘書韻其後就話爆咗呢單嘢之後，「不斷受到各種恐嚇、威脅，包括威脅找所謂痴（黐）線勇武手足對付我和劉家衡，他叫我的朋友要『㩒住我』不再說這件事，否則他也控制不了那些痴（黐）線勇武手足......為了滅我聲，身邊的人全遭受攻擊，包括所有相熟的女性朋友，亂指控她們做雞、『發國難財』，想我為了保護他們不再追究事件。」
但之後，唔知發生咩事，潘書韻就話係對方不願公證對數，「又作（做）出公開學生手足資料的行為來威脅」，「為保障學生安全」，佢決定不循此途徑追究，但會資助受騙的苦主追討的律師費，又要對方全數歸還以前用不法手段騙取的金錢等等。
呢單嘢，睇怕都仲有好多花生食。