梁振輝 香港資深出版人
......續上期
助導1：好耐都冇咁早收工囉噃，唔使預我，我返屋企搵老婆仔「查篤撐」（撐枱腳）！
攝影師：藉口嚟啫，嗰啲「查篤撐」（暗喻「行房」）咋卦？
燈光：人哋新婚唔夠嗰一個禮拜，唔好踢爆佢喇！
助導2：學校正話打電話嚟，話個仔同啲同學仔「查撐篤撐」（爭執或打鬥），搞到成班拉晒上差館問話，叫我即刻去差館「執仔5」喎！
助導1：好似唔係第一次個囉喎！
助導2：咪係，返到屋企我唔同佢嚟個「查撐篤撐」（大開殺戒），就跟佢姓！
余導演：好笑嘞，乜你個仔唔係同你同姓嘅咩？不過而家啲「??仔6」真係唔縱得㗎！錄音陳，你又咩嘢環境呀？
錄音陳：我就啱啱打咗畀隻「老虎乸7」，佢話約咗班「fan8」去睇「查篤撐」（大戲）喎，仲話話知我去邊「恕9」「查篤撐」（吃喝玩樂）吖！總之唔好「撐」吓「撐」吓，過咗橋「查篤撐」（尋歡作樂）就得嘞！
婷婷：「過橋」？咁即係去邊呀？
錄音陳：「過羅湖橋」囉！
為為：咁過咗橋又點啫？
燈光：咪即係人成日講嘅「北上尋歡」囉！
婷婷：嘩嘩嘩，你哋「曳曳10」嘞！
道具：嗱，錄音陳，跟住有乜「查撐篤撐」（即興活動），我哋都唔預你㗎嘞！
老闆：各位，我有事要走先！今晚大家盡情「查篤撐」（吃喝玩樂），全部「chem公數11」！
助導2：老細真係「識do12」！好，我預祝部戲出街嗰陣「查撐篤撐」（大賣座）！
佈景：到時咪又再「查篤撐」（吃喝玩樂）囉！老細可？
老闆：點止「查篤撐」（吃喝玩樂）呀，「查撐篤撐」（另有下文）都仲得！好嘞，各位請請！
婷婷：老細再見！咦，係咪聽者都有得「查篤撐」（吃喝玩樂）先？
余導演：冇問題，不過到時唔好「放飛機13」至好！
為為：咁嘅場面，梗係嚟「查篤撐」（撐場）喇！
副導演：相請不如偶遇，擇日不如撞日，等陣「查篤撐」（吃喝玩樂）就預埋你哋嚹！
婷婷：吓，同成班大男人去「查撐篤撐」（尋歡作樂）？
為為：阿媽話過冇必要就唔好同啲陌生人一齊喎！
婷婷：為為，我突然間有啲唔舒服......
為為：哦，咁即係留番我一個人喺度「查撐篤撐」（支撐大局），婷婷你都算好夠義氣噃！
余導演：副導演同你哋「講小14」咋！嗱，點都好喇，今日你哋嚟嘅目的應該已經達到嘞！
婷婷：吓，聽你哋喺度「查撐篤撐」（隨便說說）就算「索15」咗料㗎嗱？為為，你「get16」到幾多呀？
為為：知啲唔知喇！不過你唔使擔心，我已經錄晒音，返去「擗17」咗畀輝Sir，就話知佢「一支公18」成晚「查撐篤撐」（奮力工作）喇，哈哈哈......
綜觀而言，「查撐篤撐」可作為「查篤撐」的加強版。運用上，「查篤撐」和「查撐篤撐」屬非常獨特的用詞，所表達的意思會隨着不同的語境而改變，且所涉搞作具一定的張力。
_____________________
5、「執仔」原指社工的外展工作--由深宵時分一直 「執」到翌日清晨6時，勸喻年齡介乎6至24歲的 「仔」（青少年）回家，減低他們誤入歧途的機會； 現指保釋或在有條件下把當事人帶離現場。
6、「??仔」指小子；「??」讀「靚3-1」。
7、「老虎乸」是老婆的戲稱。
8、「fan」指「friend」，解好友。
9、「恕/syu3」由「處/cyu3」變聲母而來。
10、「曳曳」指做不道德行為；「曳」讀「曳6-1」。
11、「chem公數」指「claim公司數」，即開支可向公司索 取。
12、「識do」指識做，即懂體恤。
13、「放飛機」指爽約。
14、「講小」由「講笑」音變而來。
15、「索」指索取。
16、「get」指領會。
17、「擗」，讀「劈3-6」，指擲交。
18、「一支公」指一個人。