好耐冇人理過「熱狗（熱血公民）」啲清算活動，估唔到嚟到2020年可以藉修例風波又嘈過。前「熱狗」李政熙似乎真係坐監後人生更精彩，藉嗰間「國難五金」派裝備推年輕人以及兒童去犯法，竟然咁缺德嘅行為，就幫到佢喺「黃絲」陣營攞到唔少光環。不過，親「熱狗」嘅facebook專頁「顥魄砌機」日前踢爆「國難五金」20蚊一個口罩，明明冇平到就當自己平賣，另一專頁「學民苦主大聯盟」見狀食住上追擊「國難五金」，問佢點解會有無限資源、順利入貨等，質疑對方係「鬼」，仲聲言要去廉政公署、稅務局等舉報佢𠻹。
李政熙同「熱狗」陣營都唔係第一日有仇，由之前李政熙開所謂「國難五金」時叫人寫「國難家書」交畀佢，結果「國難五金」無耐就俾警察查兼帶走「家書」，俾熱狗質疑係「鬼」，到舊年12月初「熱狗」成員鄭錦滿喺fb暗寸「國難五金」搞裝備都多是非、「國難五金」反擊話鄭錦滿打女人，雙方已經係咁嘈緊。不過，近日終於嘈得有啲公共性。
親「熱狗」專頁踢爆賣市價
事緣係呢排多人買口罩，亦都有人炒口罩，「國難五金」星期三就出post話佢啲香港製造嘅殺菌口罩20蚊隻，話大家「唔使出去食炒價」，自己以「打壓同業為樂」咁話，咁就有成萬人讚好畀心心，仲有人特登去買𠻹。
由曾經喺2014年11月19日衝擊立法會綜合大樓，被控刑事損壞、非法集結罪成最終被判監禁3個半月嘅石家輝經營嘅「顥魄砌機」fb專頁，見狀嚟招大踢爆，指同一口罩喺其他地方都係賣緊99蚊5個，即係仲平李政熙1蚊添，「賣市價當平價，掃哂（晒）d（啲）貨當打壓『同業』，有心做就派啦，或真平賣。」
佢講講吓仲好似有料爆︰「做×人利用金主既（嘅）錢來賺盡名利換新車，但我相信公義最終會來臨，篤魁狗李政熙遲早得到報應。」
遭圍攻後即刪post
「Kate Lam」揶揄︰「佢啲fans值得擁有。」「Tommy Tsang」就留言話︰「觀塘工廈賣緊$80 5個。」「David Ko」亦暗寸李政熙發「災難財」︰「有名你叫『國難五金』。」
李政熙見到俾人踢爆，就喺「國難五金」度出post話係「私怨」，寸返「顥魄砌機」話：「你咁×叻免費幫啲兄弟砌機呀嗎！」仲稱石家輝坐監時「帶綠帽」，明顯人身攻擊，但就冇回應過自己點解扮晒大平賣。
「學民苦主大聯盟」就加入戰場，叫對方「唔該有證據就攞出來，唔係你就係誹謗，不過一個人格好似你咁低下嘅人淨係識得誣衊同抹黑當然唔出奇。」「Ka Fu」就反爆料話︰「佢唔講下佢成日開草P（疑指大麻派對），成日話『熱狗』乜乜乜，佢又好人得去邊！」
「學民苦主大聯盟」之後又連環出post，叫「國難五金」交代點解「似乎有無限資金提供裝備，而且有鼓吹小童上前線嘅作風」，懷疑佢背後另有支持，「作用就係請君入甕」；之後又問點解人哋不停俾海關扣查，但「國難五金」就可以順暢入貨；再質疑「國難五金」有冇交稅。
「學民苦主大聯盟」仲踢爆話︰「『國難五金』，你為何只會慫恿其他人去做你口中嘅『挺身而出的凡人』而自己就發『國難財』？理大一役你講過你會去現場，最後有冇去過你心知肚明。」
李政熙本身都有回應過佢哋，但之後又刪咗post，喺「國難五金」度依然「太平盛世」，仲有支持者讚佢市價賣口罩𠻹。咁又係，𠵱家啲人只係識前「熱狗」李政熙，邊有人仲記得「熱狗」啫。
■香港文匯報記者 甘瑜