■雪糕店鬧話佢消費「抗爭者」嘅人係「冷氣軍師」，有人製圖反諷。 fb截圖有時啲「黃絲」真係好分裂㗎，呢頭賣慘情，嗰頭賣雪糕，竟然有人咁都覺得冇違和感㗎喎。荃灣有間雪糕店近日推出一款所謂「催淚彈」味雪糕，話係想大家唔好忘記「抗爭者」喎，但唔少網民就覺得間雪糕店就真係冇忘記要消費「抗爭者」嘞，鬧爆佢哋食人血饅頭，但有啲鍾意食玩瞓嘅「黃絲」就依然支持，間雪糕店就鬧啲話坋禷O「抗爭者」嘅人係「冷氣軍師」。其實又真係點鬧都啱嘅，過去7個幾月佢哋都係一時一樣咁鬧人㗎啦，唔係仲未慣啊嘛？
facebook專頁「See生活」前晚出咗個post，話荃灣荃新天地有間雪糕店，出咗款「催淚彈」味雪糕，個老闆話「係希望大家消費嘅同時，唔好忘記一班『抗爭者』喺過去咁耐以嚟嘅無私付出」，仲揚言一日未「抗爭成功」，一日都會賣呢款雪糕。之後個老闆就懶幽默話雪糕不含二噁英或有毒殘留物喎。
同道批「兄弟爬山唔包玩膠」
呢個老闆仲有心思研發新雪糕口味，但好多「手足」就唔係咁諗。「Enya Wong」客氣地話︰「唔好攞呢d（啲）嘢黎（嚟）講笑。」「Joyce Tang」火爆地鬧︰「對唔對得住『殉道』班『烈士』？嗰上萬粒tg（催淚彈）係咁（畀）你當噱頭賺錢？唔好又話兄弟爬山啊，玩膠唔叫爬山架（㗎）。」「Yuu Yau」亦反問︰「好好玩？咁鍾意食催淚彈走去前線用個口接住黎（嚟）咬啦。」
「Gordon Li」就揶揄：「有冇人血饅頭味？」「Anya Tan Terence Chan」恥笑：「一早都話佢哋中（鍾）意催淚彈味㗎啦，唔吸唔安樂！」「Vinus Chan」道：「喲（啲）家長帶埋細路出黎（嚟）示威，又話有毒叫警察唔好射，而（𠵱）家叫人食，思覺失調！」「Toto Le Hero」就講得最直接：「大佬呀唔好咁黐線啦！」
為免槍林彈雨嘅罵戰擊殺自己人，有啲「黃絲」就出嚟澄清間雪糕店係「真黃店」，仲話間舖頭有支援過「手足」。「Jeff Arlo」反擊︰「有D（啲）人以為救完人就可以攞正牌做其他蠢事，而港珠（豬）一見話救過人就射咗，唔再思考下（吓）佢做嘅其他野（嘢）啱唔啱。」
老闆還拖被問係咪想「裝修」
俾人鬧到咁，間雪糕店都自爆身份，用舖頭賬號「Sogno Gelato」留言開拖︰「我做乜×野（嘢）唔×啱呀，出黎（嚟）講喇，落鋪（舖）等！」佢又話自己食催淚彈一定多過「冷氣軍師」，語氣真係同啲黑衣魔一樣。間舖仲話自己整呢個雪糕仲有《紐約時報》訪問??。「Reiji Ri」恥笑︰「國際線？我只睇到×事×出國際，係你自己自我感覺良好覺得好威咋。」「Andy Leung」終於帶出熟悉嘅台詞︰「Sogno Gelato，你係咪嫌自己間鋪（舖）太舊（要裝修）？」
■香港文匯報記者 甘瑜