醫者除了要「妙手」，更要「仁心」。只有「視病猶親」，先至唔會愧對病人把性命託付嘅重任。fb「Medics HK 香港醫護」群組就喺前日流出咗幾張威爾斯醫院同律敦治醫院嘅內部照片，發現原來真係有咁多醫護喺公立醫院內宣揚「仇警」。唔少網民批評有關人等利用公立醫院作個人政治訴求，有違職業操守，醫管局應該予以嚴厲紀律處分。
失實仇恨言論 違操守害病人
喺威爾斯親王醫院主大樓1樓嘅通道，兩旁「暴大」醫科生嘅locker上就貼滿唔少「仇警」標語。其中367號locker上就貼咗張唔押韻嘅打油詩，上面有紅筆寫住「謀殺！！」黑筆則寫住「香港警察唔係人 市袋橡膠直射人 衝入地鐵放催淚 毒煙籠罩每一區」嘅標語，再上面又貼咗張寫着「何君堯可恥」等等。呢種將負面情緒帶入醫院嘅行徑顯然有違醫護專業，自然俾唔少網友留言鬧爆。
的確識攞6個5**都唔代表就做到個好醫生，「Joyce Ma」就覺得醫學院更應注重培訓醫科生的專業醫德：「Just reveals that medical students don't know what's professional ethics，強烈要求要考核學生個人道德水平，黑心腸怎醫人，未曾畢業，已經先致力散播仇恨言論，知否會很大機會嚇死病人的。」
有網友就建議院方應對滿腦仇恨嘅醫護提供適當治療，比如「Tse Ann」就話：「𠵱家香港真恐怖，啲人失智到冇邏輯思維，只有仇恨，再咁落去香港是否會暗藏好多計時炸彈？這些人真係及早接受治療好啲。」「Chan Ky」就質疑「全個HA都黃」，令人擔心「醫科生唔跟可能冇得畢（業）」。
「Anthony To」就唔明點解醫護要雙重標準、支持暴徒而仇恨警察：「 醫護人員，你地（哋）可有譴責暴徒多次私了無辜的市民嗎？無？你地（哋）支持牠（他）們使用暴力？但譴責警察使用武力平亂？何解？」
在律敦治醫院，有人就喺醫生辦公室見到兩張寫住「他的名字叫周梓樂，他只是恰巧不是你家兒子」及「就算戰地醫院 亦須先解除武裝 執法為名 濫權為實 解散警隊 刻不容緩」嘅標語。身為醫生竟然喺醫院內消費死者認真離晒譜，「Belle Ko」就直斥：「仍然消費死者，真係死唔眼閉！」「Van Yau」就話：「利用公共醫院作個人政治訴求，唔理事實根據抹黑警察，唔單止冇醫德，更加冇職業操守，應該接受嚴厲紀律處分！」
「Connie Tse」則鬧爆無良醫護唔顧病人感受：「黃絲係冇醫德㗎喇，不停將政治帶到醫院，罔顧病人情緒，有冇諗過好多病人可能好唔想睇到呢啲咁嘅宣言，有冇考慮過病人睇到呢啲宣言會唔會影響心情，呢啲咪你哋班黃絲醫護做嘅嘢囉！」 ■香港文匯報記者 黃書蘭