■黃子華日前在fb拍片澄清。黃子華fb短片截圖之前被街工立法會議員梁耀忠剝削而另起爐灶嘅「勞工組」，日前揚言藝人黃子華自導自演嘅《乜代宗師》，「收數百萬元片酬，卻以香港製作成本高為由，北上深圳拍攝電影」，於是列入「和你罷睇」名單。被唔少黃絲視為「子華神」嘅黃子華日前就拍片解釋，話冇收過一毫子，仲賣咗層樓拍戲，都係為咗拍香港電影。炒咗車嘅「勞工組」就輕描淡寫除返名當無事，仲「祝福」黃子華第日有「足夠資金」拍下套香港電影，「毋須再剝削自己和工作人員。」呢啲唔認錯嘅態度，搞到啲黃絲火滾去洗版，要求佢哋道歉，不過黃絲唔係要拒絕所有內地製造嘅嘢咩？諗好立場未先？
批收幾百萬片酬北上取景
「勞工組」日前喺旺角繕饈腹A宣揚罷睇「紅色賀歲片」，其中黃子華套《乜代宗師》都有份。佢哋唔知邊到收到風，話黃子華收咗數百萬元片酬，但就嫌香港拍戲貴選擇北上。佢哋聲稱，「影響製作人工過高的是扭曲的明星制度」，反問大家「係咪上咗神台嘅子華神就一定要支持？」《蘋果日報》同埋《立場新聞》都有幫「勞工組」宣揚呢個「名單」，佢哋又二次轉發擴大影響，立志要大搞特搞「黃色經濟圈」。
不過好快黃子華就自己拍片解釋件事，「我做埋編劇、導演、演員，都冇收過一毫子」，更仲為咗咁而賣樓??。雖然套戲係喺深圳拍，但就唔係合拍片喎。
「勞工組」炒車之後，喺facebook死撐話自己一開始評咗套戲做「一粒星」，係「有討論空間」，但「感謝」黃子華回應，仲話會喺「罷睇名單」將《乜代宗師》除名。不過，佢哋依然句句有骨咁「祝福」黃子華第日有「足夠資金」拍下套香港電影，「毋須再剝削自己和工作人員」喎。
而近日高調宣傳唔幫襯內地製造產品嘅黃絲，就為咗黃子華放棄底線，矛頭一致對準「勞工組」，去佢哋fb洗版要求佢哋道歉。「熱狗」陳秀慧就鬧佢哋︰「屈完人，道歉都唔使，仲可以高姿態（企喺）道德高地回應。」「Chicharito Ho」話︰「『正式將之除名』嘩，×你，好×大威嚴呀，巴閉啦你！」「Flow Lee」就揶揄佢哋︰「原來閣下係大台，失敬失敬。」「Kenneth Ip」就直言︰「自己冇責任調查，人地（哋）有責任解釋。」
陳秀慧批屈錯人唔道歉
「Shek Chun Chiu」話：「班黃絲已經癡（黐）曬（晒）線，生活上所有事都要同政治拉上關係，其實咁做係好悲哀。」其實過去7個多月都係咁啦，不過今次辣着你哋個「子華神」啫。 ■香港文匯報記者 文根茂