人哋抗疫，佢哋做騷，講緊嘅就係大埔班泛暴派區議員。特區政府之前先講咗所有諮詢同法定組織兩個星期唔開會，但大埔班泛暴派區議員噚日又開山寨會議，仲「通過動議」要特首林鄭月娥同警隊去武漢抗疫，以表政府「愛國」、警隊「忠誠勇毅」 喎。咁小學雞嘅心態，連有份開會嘅「熱血公民」黃兆健都頂唔順，發文鬧爆班議員面臨疫症都仲「玩膠」，睇唔到有咩意義，於是用腳投票，早早離席唔陪佢哋癲。
開山寨會叫特首上武漢
大埔班泛暴派區議員噚日又開山寨會議，仲一再討論區議會職權以外嘅嘢，大炒政治，包括要醫管局唔可以追究罷工醫護等，仲要求林鄭月娥同警隊去武漢抗疫，真係令人搲晒頭。
佢哋集體失智嘅行為，連泛暴派自己人黃兆健都頂唔順，話「玩膠都費事」，中途走先，再喺facebook發文鬧佢哋「玩膠玩到樂此不疲」，「相信並非普羅大眾對議會的期望，我亦看不出有任何實質意義。」佢仲揶揄班區議會同事話︰「不如開個工作小組專玩膠，咁我好預啲時間。」
網民批有時間不如派罩
對於佢哋嘅鬧劇，唔少網民都留言鬧埋一份，話佢哋掛住玩而漠視民生。「Leslie Chan」話： 「佢地（哋）之後想用咩方法另（令）到呢件事可行？真係倒不如係（喺）口罩不足既（嘅）情況下，強化衛生環境重（仲）好啦......」「Jimmy Man 」就話：「不如關注下（吓）大埔區民生問題先，注意下（吓）地方環境清潔衛生消毒，派口罩，減少街坊受感染措施等等！因此（為）肺炎會死人，不是說笑。玩嘢不是現在時間！」「Joanna Chan 」都話：「就好心區議員做番（返）自己區嘅工作啦！幫老人家找下（吓）口罩，派下（吓）消毒用品比（畀）佢哋，關心下（吓）他們吧！你哋係區議員唔係立法會議員呀！醒未呀！地區工作都未做好， 做埋冇（無）謂嘢！」
不過，今時今日再離譜嘅事都有支持者，有人唔抵得黃兆健話其他議員，於是就留言寸黃兆健黨友都係咁上下，「（「熱血公民」成員）鄭錦滿發動既（嘅）『圖書館戰爭』算唔算玩膠？」又真係駁唔到喎。■香港文匯報記者 黃書蘭