今晚谷草安排八場賽事，以最窄C加三欄C加六彎跑道作賽，頭場下午七時十五分開跑，全晚未有設立錦標賽場合。練馬師方面，姚本輝及方嘉柏皆派出不少實力馬參戰，值得優先留意。騎師方面，潘頓、雷神及田泰安固然要重視，另外半冷可向黃俊之坐騎埋手。
第一場、第五班、二二○○米。「活力得勝」大前次跑田草千八，其實賺了當日早段利前置的偏差入Q，但前仗爭谷草二千二，就充分反映出馬兒的韌力，前八百米被逼望空，最後可負隅頑抗入位，已算交出水準；上仗縮爭千八，排外檔兼慢閘情況下再跑第三，顯示出必有虛分在手，今次轉爭二千二大長途只要配合形勢，贏馬厚望。
第二場、第四班、一二○○米。「木火同明」今季初出即以大冷身分跑入亞軍，當時根本未在十足狀態，但縱使如此，馬兒能夠一出即上名反映懷質不薄，而經過一連串上陣考驗，跑至上賽谷草千二卒現真身跑入配腳；馬房可用籌碼不多，省過開氣今次再臨當有取勝資格。
第三場、第三班、一○○○米。「奇妙星」上周三加眼罩復爭谷草千二，出閘後竟見鞍上人力扣韁繩走外疊兼有點搶口，結果轉入直路騎落唔多只負「大紅包」兩個幾馬位，拚後復課所見狀態仍弗，今次匆匆入紙縮爭一千，臨場如有風吹草動可予再跟一趟。
第四場、第四班、一六五○米。「三圓馬覓路」上季在三班中游起步，多番落敗後，評分顯著下調，上季尾角逐四班田草千四已見有反彈之力，若非直路後上無路及衝刺受阻，當可在前列過終點。踏入今季，此駒在開鑼日殺入Q腳，只是不敵「熱血鬥士」；季中轉投蘇廄，練者摸到訓練竅門，上仗卒在田草千四開糊，今次渡江轉爭一哩對手非強，如合跑窄場當有再捷本錢。
第五場、第四班、一二○○米。「多姿多財」前仗初出谷草一千配潘頓，可是頭段跟隨「閃電精靈」致末段乏力，三倍熱門倒灶而回；賽後潘頓親自試閘兩次，走勢可人，上仗轉戰千二排二檔早段貼欄，對質新馬是利好因素，結果大熱門不負所託以半馬位取勝，勝後仍留四班搵食，今仗如克服磅重當有添食分量。
第六場、第三班、一六五○米。「鴻圖巨星」前仗出爭四班同程，起步至入直路彎前走位一絕，奈何末段雷神捐入內欄最不利場地之下衝刺，最後以馬頸位落敗未竟全功；上場升三班重戴眼罩再戰此程，走來角逐意識增強，加上雷神走位刁鑽將功補過獲勝；今賽續爭同程，環看對手實力似是而非，只要交出上賽水準當有力梅開二度。
第七場、第三班、一二○○米。「勝利在手」今季表現進步，近三仗轉跑谷草千二取得兩勝，大前仗貼欄競跑，直路雖曾外閃，但只打三鞭便輕勝「特駒聯盟」；前仗排九檔起步，早段先拍實「同盟力量」於二疊放頭，結果成功連捷；上賽升三班再戰，排九檔巴度採取放頭戰略切入領放，帶到拉士乏力只跑第六；四歲仔今次繼續瞄準強項，埋門出試火力俱佳，只要騎者操控得宜，當有再捷本錢。
第八場、第二班、一二○○米。「君達星」今季去了從化受訓，新環境似乎有助療傷，果然季內首戰即殺聲震天捧成大熱，結果順利一放到底，狂勝逾五個馬位；翌仗四升三班再度一放絕塵輕鬆添食；前仗三升二班一樣熱門取勝，不過連贏三場後加分太多，剛役殺上頂班雖然被受追捧，豈料此駒撞閘走甩，捉回再跑下倒灶，賽後試閘考驗走勢依然爽勁，狀態對辦，現捲土重來且看可否還我本色。