「隔籬飯香」、借外國一啲以偏概全嘅消息嚟抹黑特區政府一向係黃絲嘅慣技。「黃絲工會」嘅香港調酒師工會主席侯翠珊嗰頭話對特區政府為防疫規限人群聚集表示不滿，但轉頭又話政府防疫工作做得唔夠，導致香港「疫情失控」，叫政府跟「冇咩確診個案」嘅英國學嘢，真係「龍門任佢搬」。
有醒目嘅網民就指，英國近日單日嘅確診個案創新高，所以侯翠珊係亂噏當秘笈，睇嚟黃營真係「蜀中無大將，廖化作前鋒」！
侯翠珊早前出席《城市論壇》時話，香港嘅防疫工作同企業支援都唔及英國，仲話英國「做得好好」，所以新增個案飆升得唔勁，叫特區政府「好好學習」喎。
該片段隨即俾網民截圖澄清，話事實係英國當日新增2,885宗確診個案，是英國自疫情以嚟嘅新高，並紛紛恥笑侯翠珊係「低質黃絲」。「Willson YL Yap」揶揄：「人一黃，腦死亡。」「Fion Leong」亦質問：「英國控制得咁好，點解唔快啲去英國避疫？相反仲要大批人搶天價機票返香港嘅？」
工聯會立法會議員陸頌雄睇完亦忍唔住喺facebook開post寸侯翠珊，問對方到底有冇睇新聞，「知唔知英國首相、王儲、衛生大臣都中咗招？」
佢仲話，「黃絲」水平低就眾所皆知，但舉辦節目嘅香港電台亦要負責，唔應該畀啲「黃絲工會」周圍「派膠」、誤導觀眾。網民「Davis Man」留言道：「講者無Fact check就想當然，錄播的編輯又唔去查證，RTHK（港台）幾時變得咁馬虎？」■香港文匯報記者 鄭治祖