為咗侮辱警方同騎劫民意，黑衣魔連死者都唔放過？香港科技大學22歲學生周梓樂墮樓離世嘅事件，成為泛暴派上位嘅「階梯」，本以為黑暴隨住疫情減緩，可令死者安息，但暴徒日前又喺網上討論區「連登」假「悼念」之名，企圖發起新一輪暴動。
舊年11月4日，周梓樂喺將軍澳尚德邨停車場從3樓墮至2樓平台，最終延至8日不治。由於當時臨近區議會選舉，令泛暴派連日散播謠言，稱周梓樂係「因避警方施放催淚彈時失足墮樓」，甚至係被警員「推落樓」，但當有關閉路電視片段公開後，謠言已不攻自破。
泛暴議員又食血饅
唔少泛暴「素人」藉此成為薪高糧準嘅區議員後，仍唔肯放過死者。西貢區議會部分泛暴派議員就喺今年3月動議用周梓樂嚟命名區內嘅公園，結果被社會一致狠批是要食「人血饅頭」，但黑衣魔不肯罷休，喺連登熱帖「5月8日周梓樂半週（周）年悼念遍地開花」中，叫「黃絲」喺唔同欄杆綁白絲帶，仲話「就算『藍絲』『黑警』要拆白絲帶，我哋都要佢哋逐一向梓樂嘅『白絲』帶彎下身先可以逐條剪走，要佢哋一齊向梓樂鞠躬！」
有網民仲轉發另一帖子，建議今後實施「前三後三」嘅悼念活動，即每月18日至24日都喺各區「悼念」包括周梓樂在內嘅死者：「睇下（吓）班狗係咪守足咁多日、清足咁多日！」
唔知係咪因為疫情，定係愈嚟愈多人睇穿暴徒伎倆，兩個帖子嘅反應非常冷淡，發文兩日分別只得近60同40個讚好，亦冇乜網民回應，不過有唔心息嘅網民「試逃行者」就話：「到時就大把嘢玩，『連登』手足大家諗諗！」 ■香港文匯報記者 雨航