人過留名，雁過留聲，但人稱「民主阿婆」嘅陳方安生又留低咗乜？噚日佢要退出政壇嘅消息一出，昔日同佢一齊「賣港求榮」嘅攬炒派馬仔都捧到佢上天，但唔少攬炒派中人都非常鄙視呢啲言論，並狠批陳方安生根本對香港「民主」冇乜貢獻，更有網民直言佢退場根本係身有屎，同乜80歲無關囉。
曾與陳方安生一樣樂於去外國賣港求榮嘅攬炒派公民黨黨魁楊岳橋噚日喺facebook發聲話，「感激」陳太「為香港多年付出，請多多保重。」佢黨友郭榮鏗就專登用英文話自己好榮幸同呢位「尊貴嘅女士」一齊服務，跟佢學習多年，再貼咗張同陳方安生、「專業議政」立法會議員莫乃光之前喺外國賣港求榮嘅合影。莫乃光都轉發呢個帖文，反問香港仲有冇「良心」喎。
不過，唔少攬炒派中人都對呢啲擦鞋言論嗤之以鼻。「人民力量」劉嘉鴻喺facebook話：「任何人都有權退下來，旁人不必置喙。但睇見排山倒海式對一個民主credentials（信譽） 薄過紙、遊行突然中途去恤髮、一心齋等中共『讓步』嘅『民主阿婆』善頌善禱，我夷然。」佢仲用hashtag提醒啲人「時為2020年」，暗寸陳方安生之前搞「香港2020」，結果到2020年就「縮人兼縮皮」。
網民「Henry Ngan」亦話：「請問佢民主（做）過d（啲）乜？」「Chi Chuen Li」直言︰「係要退嘅話80歲大壽嘅時候就已經退咗啦，使乜幾個月之後國安法出臺（台）先至講呢？」「Sau Ping Ling」都覺「現在揀這個時間說退下來，明眼人睇出，因為她怕了，怕什麼哩（呢）？」「白紙 WHITE PAPER」話︰「一個（陳方安生）話退休，一個（禍港四人幫之一李柱銘）話唔好攬炒。耐人尋味。」「Paterlik Lau 」說：「善惡到頭終有報。作惡幾十年真的三言兩語就可以避開一切惡報？......大家坐低慢慢等看呢套說因到果的故事結局吧！」
■香港文匯報記者 文根茂