■楊明與陳曉華在無綫劇集《迷網》中首度合作，新鮮感十足。香港文匯報訊 （記者 梁靜儀）楊明與陳曉華（Hera）在近日播映的無綫劇集《迷網》中首度合作，二人早前接受香港文匯報專訪。劇集以網絡安全及科技罪案調查作背景，具有教育性，楊明飾演網絡科技調查組高級督察，與飾演見習督察的Hera亦師亦友，屢破各種電話、網絡、科技騙案。曾多次扮演警察角色的楊明，笑言不怕被定型，對演警隊其他部門警察都有興趣，最想演水警；而港姐出身的Hera就希望挑戰神婆角色。
再次扮演警察，楊明表示今次的角色跟以往稍有不同，因隸屬的部門比較靜態，主要是靠「食腦」查案，不過亦有難度：「我哋網絡科技調查組啲對白唔係人講，啲電腦網絡名詞好繑口，對白又長，搞到不停NG，好彩有其他演員幫我分擔至輕鬆少少。」楊明又指雖然今次動作戲不多，但亦不乏大型場口，其中有場戲講他與Hera捉賊，兩人在尖東海旁跑了一日一夜。楊明亦大讚 Hera以新人來說都算好勁：「Hera首次拍劇好快上手，走位又準，對白又難唔倒佢，因為初拍戲有時顧得個頭又顧唔到個髻。」獲稱讚的Hera表示好開心，並指開工時會留意其他演員講對白，遇上不明白的地方就會發問。
劇集以網絡安全及科技罪案調查作背景，劇中很多都是真實個案，楊明表示拍攝前亦有做資料蒐集，並跟當事人了解，但有時聽完個案後他都很疑惑，為何一些很簡單的騙局都會有人上當，仍然在社會上發生。問到他可曾遇過網絡騙案？楊明說：「試過遇手機騙案，有人喺WhatsApp叫我入點數卡，我有追開《警訊》，所以一睇就知道係呃人，其實好容易find out到，因為就算好朋友要借錢，可以打個電話親身問清楚至幫手，冇需要喺手機見到幾個字就去買點數卡，而呢套劇有教育同《警訊》feel，啱大家睇。」經常飾演警察及紀律部隊的他可怕被定型？他笑稱不怕：「仲有好多部門未做過，暫時最想演水警，我好好奇水警嘅日常工作，我睇過一條有關水警嘅短片，發現原來好有挑戰性。」
Hera自爆拍攝初期不停NG：「因為我好驚，同埋我發現對手係冇人NG，好擔心阻人收工，但每當我NG其他演員就會好大聲話唔怕、唔怕、唔怕、唔緊要，好大反應，仲大過我，唔知呢個係唔係就係壓力，但聽落去時又好sweet。」楊明就安慰她：「個個演員都會NG，佢又係新人，大家對新人都會包容，加上大家好快就混熟，又一齊捱更抵夜，會互相支持。」
近年楊明經常都有機會跟新演員合作，但他表示不會主動教新人演戲，卻樂意分享自己22年的演戲經驗及竅門，有時感到對方不想聽，他就寧願慳返啖口水。問到他當年做新人可有遇過前輩不友善對待？楊明憶述當年做新人，見到前輩要必恭必敬：「當年做新人，入到化妝間先要鞠躬，再講：『唔該，我叫楊明。』以前啲前輩個個都可以鬧喺藝員訓練班出嚟啲學員，又會畀大卡士白眼，同埋當時啲幕後好認真、好惡。我見到汪阿姐就好驚。」
陳曉華愛上演戲想扮神婆
相比之下Hera現時做新人幸福得多，不過她見到前輩演員都仍會好緊張：「當初知道夥拍楊明都好緊張，覺得佢個氣場壓住我，因為演戲時要望住佢對眼，嗰時又唔熟佢，不過過咗一個禮拜之後就好好多。」談到拍此劇的難忘場面，Hera表示記得有一場夜晚在油麻地果欄拍攝追賊的戲份，至今仍很深刻：「當晚我同楊明同另外一個男演員要喺條街跑，跑緊期間突然有人同我講，話如果我跑唔到就會畀後面架車輾過，我聽完好驚，於是不停跑，仲要唔好仆親，我都係第一次同男仔跑得差唔多快，好彩最後冇NG。」
拍劇生活日夜顛倒，但對Hera來說每樣事物都充滿新鮮感：「我會繼續拍，拍劇好開心，我鍾意呢行生活模式。」問到有什麼角色想演？港姐出身的她，笑言已沒有港姐包袱，最想挑戰演神婆角色：「我拍另一套劇集見到有演員演神婆角色，覺得破地獄場面好勁好得意，所以都想嘗試一下。」