十三屆冠軍騎師韋達，上季棄騎從練，開倉立萬首季就贏得四十四場頭馬，有此出色成績除十三少夠勤力，日日落手落腳親自操馬外，其實背後有成班人一齊默默耕耘，充分發揮出團隊力量，好似每朝韋達操馬嘅時候，副練薛順強就會帶住幾位馬房手足，企喺烽火台幫手睇馬兼打錶，唔單止咁，佢團隊仲有幾個外籍高手，係韋達自己俾錢請番嚟，每朝着咗鮮紅色DW制服，靜靜坐在烽火台二樓負責睇馬，不單止係睇自己馬房嘅馬，仲會留意埋其他倉口嘅戰駒，然後等到收操後，再向波士十三少匯報，正所謂知己知彼，馬房出擊就更加得心應手。
十三少首季成績咁好，除有班專業團隊外，十三少朝朝親自操馬亦是成功重要因素，畢竟是十三屆冠軍，仄馬呢家嘢當然冇難度，所以上季有啲馬加盟韋廄後戰鬥力都得到大幅提升，最佳例子就係隻「明月昇輝」，之前兩季養在何廄，總共跑咗二十場只得兩亞一季，但上季落在十三少手上十六戰錄得兩冠兩亞一季，更屬韋達從練首匹頭馬。另一匹就係隻「超能量」，以往養在高廄，跑咗兩季都未開齋，但轉投韋廄後經連場摸底，終在窄場短途打開缺口，成功贏番場。