曾兩奪香港冠軍練馬師殊榮的大衛希斯，相隔十五年重返香港開倉，迄今合共勝出七十七項一級賽的他，現已成為全球最出色的練馬師之一，由於名牌效應自然不愁支持，在這個暑假期間，由他親自引入的揀手貨將會陸續運抵香港，相信會成為來季焦點倉口。
希斯目前接手嘅現役馬中，有兩匹是上季來港澳洲自購馬，唔講大家未必知，呢兩匹馬在運來香港服役之前，在澳洲就是希斯馬房旗下賽駒，之後賣斷嚟香港出賽，呢兩匹馬就係大摩馬房嘅「精彩勇士」，同埋蘇偉賢旗下嗰隻「四條煙」。由於兩匹馬都屬希斯在澳洲舊部屬，如今重新接手，對於馬匹脾性及性能自然熟悉，相信會是希廄來季省招牌嘅先頭部隊。
「精彩勇士」上季被編入三班評六十九分起步，在大摩馬房於五月底先至派遣上陣，總共跑咗四場，首戰角逐田草千二米已能殺入殿軍；翌仗轉戰谷草一千米卻因起步失蹄而三甲不入跑第八名；第三仗回師田草跑直路賽，卻在潘頓胯下以個幾身位不敵「夢想成金」得亞軍；之後在田草煞科戰改配郭能角逐田草千二，結果以兩個身位不敵頭馬「寶成智勝」得季軍。雖然四戰未贏，但三場田賽全入前四名，證明是匹相當有能力之質新馬，應該在季頭就可以搶攻。
至於「四條煙」，上季在賢廄三戰都有點走勢證明有潛力，新季隨時一鳴驚人。