有啲馬拚極都贏唔到，但陣上又唔會輸得遠，有時失驚無神又會剷入三甲，馬迷睇見呢啲馬嘅賽績就頭痕，明知呢啲馬勝算低，但唔買佢又驚被篤爆，對付此類馬最佳方法是買P當W賭或是拖作配腳。不過有時呢類馬如在環境上作出變動或評分下調至一定水平，要贏番場頭馬亦並非不可能嘅事，就好似隻「超能量」咁，在港跑咗三季，頭兩季養在高伯新馬房合共跑咗16場，錄得5亞2季2殿成績，經常與頭馬擦肩而過。不過上季轉投韋達馬房，經過一番摸索後，在配備上作出變動，結果在谷草1200米拚出頭來，之後仲連場取得上名成績，評分更一度突破高位。另一匹是呂健威馬房隻「醉醒神」，一度是匹8P未勝馬，但上季尾改配尺寸王潘頓，即在谷草1800米初嚐勝果。
想同大家介紹兩匹今季有機會擺脫二奶命的賽駒，高伯新馬房隻「旅遊拿督」，在港5季合共賽過42場，錄得8亞4季而未贏，雖然早幾季曾轉投徐雨石馬房求突破，但最終都無法擺脫二奶命運，前季幕後食回頭草，重返高廄後依然未勝，不過今個暑假獲評磅員體恤減咗五分，現評44分屬歷來低位，就算於新季初贏唔到，相信減多幾分落到五班就有機會作出零的突破。另一匹是「扎西德勒」，跑咗兩季錄得3亞5季，不過今季由韋達接手，有望繼「會長之星」後成為另一匹由摩廄轉投韋廄即勝馬。
