■「元朗監察議會聯盟」製圖質疑鄺俊宇。「元朗監察議會聯盟」fb圖片攬炒派把持住區議會後係咩世界？「元朗監察議會聯盟」日前就發現「黃店」豪記蔬果啲貨品擺咗出街，又涉嫌僭建，而呢間舖同鴿黨（民主黨）元朗區議員鄺俊宇有千絲萬縷聯繫，佢哋曾力挺鄺俊宇安排嘅活動，被質疑係咪因為有鄺俊宇「照住」，所以就橫行霸道。香港文匯報記者噚晚向鄺俊宇查詢，但佢就冇覆，不過喺記者查詢訊息發出去冇耐，暴露鄺俊宇同豪記蔬果關係嘅帖文內容就被人刪除咗，之後過咗一陣又加返，點解又會咁啱彈弓手呢？
「元朗監察議會聯盟」噚日喺facebook發帖話︰「立法會議員收足保護費，『黃店』擺明僭建同阻街，食環同地政唔敢執法！」個post仲附上豪記蔬果啲貨品霸街道同涉嫌僭建嘅相。
鄺拒覆求證 「黃店」即改帖
點解鄺俊宇同間「黃店」有關呢？事源鄺俊宇議員辦事處、「到家元朗」、「初見 First Sight_HK」近日搞咗個活動，探訪家庭派福袋，「到家元朗」上周六就出post宣傳件事，仲專登話「多謝豪記蔬果，令福袋更錦上添花更完滿」。
香港文匯報記者噚晚8點35分向鄺俊宇查詢件事，佢就未有回覆，不過記者條訊息發出去15分鐘後，「到家元朗」就靜雞雞編輯咗個post，保留鄺俊宇相關內容，但就刪咗豪記蔬果，隔咗冇耐又彈弓手加返，唔知點解佢哋要彈出彈入呢？
網民「藍火火」就事論事，覺得豪記蔬果「擺得好離普（譜）下（吓）。」「趙四」就好嬲︰「有黃氣照住，又有癈（廢）官頂住，市民只有谷×氣。」 ■香港文匯報記者 文根茂