■ 當提到Wilson前日病逝，家燕姐即悲痛流淚。香港文匯報訊 （記者 梁靜儀）薛家燕、胡楓（修哥）、黎耀祥（祥仔）及王梓軒等，前晚到將軍澳電視城為《流行經典50年》錄影。提起錢國偉（Wilson）前日離世，眾星皆十分難過，其中家燕姐大讚Wilson是不可多得的監製之外，亦是一位有心人，她記得之前為黎小田（Michael）離世搞紀念活動，Wilson幫她搵到Michael鋼琴伴奏的短片，令她深受感動。
提到Wilson前日病逝，家燕姐眼濕濕說：「今日心情一直都唔好，好難過，Wilson係我哋一個好拍檔，尤其係佢為我《薛家燕愛你無限60年演唱會》擔任監製，籌備接近1年，所以感受好深，都知道佢最近身體唔好，原本中秋節想去探他，但因為有疫情， 佢話唔使客氣。我都知道佢病嗰時都辛苦，但為咗太太同個女好積極面對，仲同我哋講工作上需要幫忙可以隨時打電話畀佢，佢好落力同熱心於工作，係演藝界不可多得嘅監製同導演，痛失英才，因為佢好後生。希望佢太太節哀順變，佢離去唔使受苦係一個解脫，希望他去到天國快樂，永遠都唔能夠忘記佢，好懷念佢！」
家燕姐表示過年前與Wilson還有聯絡，當時正籌備星、馬、內地及美國巡迴演唱會，但過年後因疫情很多地方都不能去因而要擱置，Wilson仲提供很多意見，好用心幫他們。之前黎小田（Michael）離世，她想唱《胭脂扣》，因首歌是Michael作曲，Wilson真的幫她搵到Michael鋼琴伴奏的短片，她很感激對方如此有心，為Michael做了一場有紀念價值的演出。她又寄語大家要珍惜健康，以及關懷身邊人。另外，家燕姐前晚亦在社交平台上載之前與Wilson合作開騷時的相片，並留言悼念。
曾拍三級片 修哥耳仔軟
修哥當晚在節目中獻唱《前程錦繡》，談到他近日被翻舊賬曾拍三級片，家燕聞言即驚訝說：「你有拍過三級片咩？估唔到修哥為藝術犧牲。」修哥搞笑說：「有拍，咩冇呀，你唔睇就蝕底。」問修哥當年是否因耳仔軟才拍？他說：「一個人最弊耳仔軟，不過牛唔飲水點撳得牛頭低，又唔係耳仔軟晒嘅。」家燕姐指修哥為人最好是敢拍敢認，她說：「佢唔會賴人哋，佢都想表演。」
祥仔在節目中唱出《義海豪情》，他形容好艱辛，因高音部分好難唱，加上最近要開工拍新劇《拳王》，經常凌晨才收工，唱得唔好希望大家包容。
為了演劇中過氣拳王角色積極減磅的祥仔明顯瘦了很多，他透露主要靠節食及做運動，一個月減去了10磅，但還未達標，希望多減8磅，並說：「仲有一個月就要除衫拍打擂台戲分，好彩部劇有張振朗及朱敏瀚，可以請教佢哋操肌經驗，我好緊張，問監製唔除衫得唔得，監製話有《殺手》時嘅身形七八成就得，但我希望更加好。」
對於Wilson離世，祥仔表示很可惜，當年他入TVB做幕後已認識Wilson，雖不是很熟，但覺得對方是個很有才華的製作人，開創好多節目經典，是個難得人才。他說：「最難忘Wilson監製節目駕輕就熟，所有嘢都好似冇難處，拍《美女廚房》佢腦筋轉得好快，又會提主持同嘉賓點樣令節目做得好睇。」
王梓軒滯留洛杉磯8個月
王梓軒因疫情關係在美國洛杉磯滯留了8個月，4星期前才回港。他說回港後最想見的人是媽咪，雖然她經常說不用見太多，但他一返來就不讓他出去，問到媽咪是否一開門就攬實他喊？他說：「唔敢攬住，等我沖個涼OK就可以喇。」
提到Wilson病逝，他表示聽到這個消息好傷心，對上一次見面已經是一年前，當時Wilson為家燕姐的演唱會擔任監製，當時並不知道對方有病，雖然對方瘦了一點，但很有活力，還做了2個演唱會，完全感覺不到有消沉、負能量，面色還很紅潤，原本諗住回港後見面，但好可惜沒有機會。
他稱與Wilson認識時大家都是演藝人協會理事，合作搞過不少籌款晚會，覺得對方很有活力，沒想到他如此後生便離世，感到突然又很可惜。另外，王梓軒亦有在社交平台上載跟錢國偉的合照，並留言：「我們今天失去了一位以毅力和樂觀感染了我和很多同行的前輩。Wilson，祝一路好走！」