● 劉祖廸回應「重光團隊」對他的指控，兩邊互揭老底，公開狗咬狗。 「連登」截圖分贓唔勻嘅後果就係一場「馬騮戲」。去年因涉嫌違反香港國安法而着咗草嘅劉祖廸，早前喺facebook話要同「攬炒團隊」「五五對分」雙方眾籌剩低嗰1,600萬元。劉祖廸離隊後，「攬炒團隊」改組為「重光團隊」同佢打對台，日前有自稱為「重光團隊」嘅網民喺「連登」開post，痛罵劉祖廸嘅惺惺作態，話明明係佢多次犯錯先會唔批錢，但就扮晒自己好委屈。不過，劉祖廸好快就出嚟回應事件，話一切都係「生安白造」，事實完全相反。呢場公開狗咬狗嘅搵權爭錢互揭老底大戲，真係睇到一地花生。
「連登」呢篇「忍無可忍！『攬炒巴』你屈夠『重光團隊』未？」文章所指，劉祖廸之所以高調離開「重光團隊」係因為理虧，不甘隊員批評而拍拍籮柚咁走咗去，又指「重光團隊」發現佢由去年1月開始多次先斬後奏，作出罔顧「重光團隊」安全嘅決定。
文章又話，雖然劉祖廸勇於認錯，但絕不改過，又提出想拎港幣650萬元，「重光團隊」雖然要求佢提交計劃書，但結果就只係收到一份內容空洞嘅計劃書，再問劉祖廸點執行時就再無收到回覆，又發現劉祖廸一聲不發就同全世界講要分家，搞到「重光團隊」最後要放話，任何人要堅持內鬥「重光團隊」會奉陪到底，佢哋唔會怕任何攻擊勒索。
劉揭「重光」當「手足」係Condom
面對「重光團隊」嘅狙擊，噚日劉祖廸終於現身，逐一反駁「重光團隊」嘅指控。佢首先拍咗一條短片，內容係話「手足」對「重光團隊」嘅批評與佢無關，更用自己條命嚟發誓，叫「重光團隊」唔好拖佢身邊人落水。劉祖廸又揭「重光團隊」老底，話佢哋內部當「手足」係Condom，更指出明明係「重光團隊」首先提出內部分家，仲要人噤聲。
劉祖廸之後仲話，佢有認真寫計劃書，但結果兩星期後「重光團隊」突然覆咗40條問題，勒令嚴禁分家，又問KPI等，搞到佢決心要公開分家。劉祖廸繼而爆料，斥「重光團隊」做事非常唔道德，包括潛入英國港僑協會核心攞料影響人哋決策，真係睇到人呆一呆。最後，劉祖廸扮晒有骨氣咁話：「幾無資源都好，我一個崩都唔會要『重光』嘅錢。」
攬炒派精彩嘅內鬥「馬騮戲」都令網民細細品味，各站各隊。「青鹿」認為「重光團隊」有錢講乜都得：「錢就你地（哋）袋×住，講乜都得啦。」
「大×灑」就怒斥：「一早已經話『攬炒巴』食人血，仲有張昆（崑）陽個（嗰）班。」「被拜登選中的細路」就話兩邊都唔係好人：「兩邊都收皮，嘔返哂（晒）啲錢比（畀）入獄『手足』做安家費。」
「紅白藍」就扮晒「和事佬」咁叫人唔好公開狗咬狗：「見唔到『攬抄』攻擊抹黑『重光』，所以唔該有野（嘢）私下拆掂佢，無謂放上黎（嚟）變表演馬騮戲。」 ●香港文匯報記者 郭家好