攬炒派區議員為反而反，唔止阻住社區發展，仲成日度計「利誘」「手足」課金。好似攬炒派觀塘區議員梁凱晴舊年企圖以司法覆核阻撓區議會工程進行，卻因申請法援被拒，撤回覆核申請，被判支付訟費22萬元。梁凱晴日前卻發起所謂「緊急眾籌」，籌得超過24萬元。想用公帑打官司又唔成，自己唔想埋單就叫「手足」啃，難怪唔少網民都鬧班人不負責任：「唔好下下都向『手足』攤大手板先得㗎，當『手足』ATM咩！」
梁凱晴今次都算係自己「攞嚟衰」，佢哋諗住將去屆區議會跨黨共識嘅項目「觀塘海濱音樂噴泉工程」推倒重來，當時已被民政事務總署以工程已展開為由拒絕。
梁凱晴同東九龍社區關注組成員鍾健華因申請法援被拒，撤回覆核申請被判支付訟費22萬元。梁凱晴日前就向「手足」發起網上眾籌，籌得超過24萬元。
網民諷梁「當『手足』ATM咩」
唔少網民都話事件反映攬炒派冇承擔。「Kam C」話：「打輸官司關『手足』咩事，唔好下下（吓吓）都向『手足』攤大手板先得㗎，當手足ATM（提款機）咩！」
「馬福田」就話：「區議員有薪金、不需4個月還清喇、何需眾籌、正大種乞衣（丐）、又要威又不想負責任、無恥（之）極！」「Tony Tang」都話：「又一個不負責任嘅好例子！自己搞事、惹禍，念（諗）住搞掂自己（就）袋袋平安，輸咗就想大家負擔！一啲擔戴（待）都冇！」
有網民質疑有人立心不良、嘥公帑。「Jenny Lau」話：「個個都用高（法）援司法覆核，即是又係納稅人出錢。」
「Samuel Lau」就以賭白頭片為喻：「那些無錢在袋，卻又參加賭局的賭徒，賭輸後無錢俾（畀）的（嘅）意思。」
網民眼睛都係雪亮嘅，佢哋大鬧班盲撐嘅「黃絲」白癡。「黃金」話：「每每都係搵『手足』埋單！」
「Bee Wong」就話：「『黄屍（絲）』最好呃，唔呃你呃邊個！」「Vicks Man」都話：「威就你攞，鑊就人揹，仲要抽水？衰意猿（議員）當班『黃盲』係白痴（癡）！」 ●香港文匯報記者 黃書蘭