●「樂文文具」死撐「吃貨之家」並非黑店，不願更換盆菜供應商之餘，更反鬧網民。 連登截圖懶理網民促換走黑店供應商 搶食血饅仲扮幫到手
政治上腦嘅「黃絲」經常自吹自擂「黃色經濟圈」有幾掂，實際上就係俾「黃店」老闆當ATM咁撳，做咗「水魚」都唔知。近日，有網民喺連登發帖，指近年嚟好多「黃店」喺淘寶買貨後隨便印啲所謂「抗爭」文宣就可以大賣，可惜無腦「黃絲」照單全收，仲有「黃店」借賣高價盆菜嚟搵快錢，但供應商被揭有黑歷史之後「黃店」堅決唔換，仲反鬧網民。睇嚟「黃圈」食水真深，仲慢慢變成一個有系統嘅掠水圈咁喎。●香港文匯報記者 郭家好
近日有網民「依家啲90後真係」喺連登上發帖，指見到近年嚟喺年宵賣嘅所謂「香港人」嘢，實際上係淘寶貨，只不過係整幾隻「香港人」嘅字上去，再打個黃色底就可以大賣，搞到佢嬲到話：「唔打『黃色』旗號，×有人買依（??）啲垃圾設計，成粒黃豆咁，依（??）兩年百×幾個畫家跳出黎（嚟）掠水。」
有網民即留言表示有同感，仲展示出喺Google一打「香港加油」即有大量劣質手機殼賣，但又貴又唔好睇，仲要質地差到貼地。網民「何喜好」亦認同話：「乜×都印『香港加油』。」
盆菜酸臭遲交貨惹眾怒
「開心爸爸」認為：「同『恭喜發財』一樣係口號同銷售手法。」不過，點都有「黃絲」無腦照「課金」，心甘命抵做「水魚」，「黃店」老闆就笑住數錢。
另外，新年期間「黃圈」出現盆菜風暴，好多「黃店」為咗搵快錢開始賣盆菜，點知質量差，又酸又臭，仲要遲遲都唔送貨，搞到「黃絲」今個新年一啲都唔開心。
不過，有「黃店」「樂文文具」眼見「黃店」「初見」搞出大頭佛，於是叉隻腳埋去搵食，聲稱佢為「盆菜苦主」賣嘅20盆，純粹出於「唔忍心」，並非搶食，但實際上係點大家都心知肚明，如果真係有心幫就唔會自己搶客啦！
其實「黃店」之間搶食人血饅頭都唔係一件特別事，不過今次「樂文文具」做得過分咗，竟然賣到鬼死咁貴，4人至6人餐就賣到成1,588蚊，10人餐更係2,288蚊，真係賺到盆滿缽滿。
「自吹」幫到苦主好巴閉
可惜，「樂文文具」被揭選擇嘅盆菜供應商，就係之前有黑歷史嘅「黃店」「吃貨之家」，因當時「吃貨之家」賣嘅「蟹粉小籠包」貨不對辦，信譽破產，於是網民質疑呢間係黑店並要求「樂文文具」更換供應商時，佢竟然反鬧返網民，稱唔可能因為一件事就當人黑店喎，仲講到自己幫到苦主好巴閉，強調時間緊急幫人要緊，「你（有）本事你去搵供應商，現貨20盆！」咁其實「初見」出事都係因為供應商有問題，點解??家網民要求「樂文文具」換個穩陣啲嘅供應商又唔得呢？唔通真係為咗快快收錢？
騙徒嘅手法層出不窮，但「黃店」掠水就千篇一律，可惜「黃絲」鍾意掩耳盜鈴。